Berriak Hezkuntza
qrcode

Euskelec 2024 lehiaketak lasterketa-zirkuitu bihurtuko du Andre Maria Zuriaren plaza, igandean

2024-05-24
  • Zazpigarren edizio honetan 18 ibilgailu elektrikok hartuko dute parte, guztiak Lanbide Heziketako ikasleek diseinatu eta eraikitakoak
  • Euskelec lehiaketa ez du beti autorik azkarrenak irabazten; ibilgailuen energia-efizientzia ere kontuan hartzen da

Dagoeneko ari dira bateriak kargatzen, balaztak doitzen eta pneumatikoen presioa neurtzen. Lanbide Heziketako ikasleek egindako 18 ibilgailu elektrikoak lehiatzeko prest daude. Euskelec 2024 Gasteizera iritsiko da asteburuan, eta Andre Maria Zuriaren plaza eta Plaza Berria ezohiko lasterketa-zirkuitu bihurtuko ditu.

Tknikak (Euskadiko Lanbide Heziketako Ikerketa Aplikatuko Zentroa, Hezkuntza Sailarena) antolatzen duen lehiaketa zazpigarren ediziora iritsi da aurten, eta Euskadiko Lanbide Heziketaren egutegian dagoeneko bere lekua eginda dauka.

Proba dinamikoak

Balaztatzea, azelerazioa, slaloma, efizientzia… Igandean proba horiek pasatu beharko dituzte Euskelec 2024 edizioan parte hartuko duten 18 ibilgailu elektrikoek. Lehiaketan ez du nahitaez eta beti ibilgailurik azkarrenak irabazten. Euskelecek autoen energia-efizientzia ere baloratzen du, hau da, bateria-karga bakarrarekin proba guztiak gainditzea. Gasteizko zirkuituak zatiren batean duen malda aproposa izango da baterien iraunkortasuna proban jartzeko. Horretarako berariaz prestatutako zirkuituan honako proba dinamiko hauek egingo dira:

  • Balaztatzea: autoa ahalik eta distantziarik laburrenean gelditu behar da, gutxienez orduko 20 km-ko abiaduran doala (Mateo Benigno de Moraza kalean).
  • Azelerazioa: ibilgailuak geldi dagoenetik 60 metro ibiltzeko behar duen denbora kronometratzen da.
  • Slaloma: ibilgailuak slalom-zirkuituari (Plaza Berrian) buelta bat emateko behar duen denbora kronometratzen da.
  • Efizientzia-proba: autoak 60 minutuan ahalik eta distantziarik handiena egiteko gai izan behar dira, goizean proba dinamikoak hastean zuten bateria-karga berarekin. Helmugatik igarotzen den aldi bakoitza zenbatuko da, eta puntu horretatik gehien pasatzen den taldea izango da irabazlea (zirkuituari buelta gehien ematen dizkiona).

Euskelecen edizio berri honetan 18 taldek hartuko dute parte: Euskadiko Lanbide Heziketako ikastetxeetan egindakoak dira 14 ibilgailu, eta Kantabriatik iritsiko dira beste lauak. Gainera, beste hiru ibilgailuk gonbidatu gisa parte hartuko dute, erakustaldi moduan.

Egiaztapen teknikoak, larunbatean

Proba dinamikoak egiten eta pistan prestazioak ebaluatzen hasi aurretik, auto guztiei egiaztapen teknikoak egingo zaizkie larunbat arratsaldean. Egiaztapen horiek baztertzaileak izango dira: araudia betetzen ez duen ikastetxea desklasifikatu egin ahal izango da. Egiaztapen horiek amaitzean, epaimahaiak ibilgailuen bateriak zigilatuko ditu, berriz kargatzea eragozteko.  Modu horretan, auto guztiek bateria-karga bakarrarekin egin beharko dituzte igande goizeko proba guztiak.

Aurretik, maiatzaren 8an, lasterketan parte hartuko duten talde guztiak Zornotzan izan ziren, Automotive Intelligence Centerren (AIC) instalazioetan, euren prototipoaren ezaugarri teknikoak eta eraikuntza-ezaugarriak aurkezten. Lehiaketako epaimahai teknikoak ibilgailuak eraikitzeko erabilitako soluzio teknikoak, diseinu estetikoa eta ergonomia kontuan hartuta ebaluatu zituen proiektuak, eta taldeak ibilgailuen memorietan islatutako alderdi teknikoen arabera puntuatu zituen.

Talde lana

Igandean Gasteizen egingo den Euskelec 2024 lehiaketaren azken fase hori Lanbide Heziketako ikasleek ikasturte osoan ikastetxeetan egin duten lanaren amaiera baino ez da. Bertan parte hartzen duten ikasleek oinarri motor komun batetik abiatuta (motorra, motor-kontrolagailua eta bateriak) diseinatzen eta eraikitzen dute ibilgailu elektriko bat. Ekimenaren helburua da ikasleen talde-lana sustatzea eta jarduera esperimentalari eta sortzaileari oinarri bat ematea, ibilgailu elektrikoen ezagutza teknikorako elementu pedagogiko gisa.

Era berean, lehiaketak trakzio elektrikoko ibilgailuetan espezializatutako teknikariak trebatzeko eta sustatzeko plataforma ere izan nahi du. Baina, horretaz gainera, fabrikazio-teknika berrien esperimentazioa eta material berrien erabilera ere sustatu nahi du.

Euskelec 2024 Tknikak antolatu du, Gasteizko Udalaren ezinbesteko babesarekin eta laguntzarekin.

Ordutegia:

Maiatzak 25, larunbata

Taldeei harrera eta boxak esleitzea

09:00etatik 11:00etara

Taldeei egiaztapenak

14:30etik 18:00etara

Maiatzak 26, igandea                                                            

Briefinga

09:00etatik 09:15era

Balaztatzea, azelerazioa eta slaloma, 1. txanda

09:30etik 10:30era

Balaztatzea, azelerazioa eta slaloma, 2. txanda

10:30etik 11:30era

Briefinga

12:00etatik 12:15era

Aurreko irteera-parrila

12:30etik 12:45era

Efizientzia-proba (erresistentzia)

13:00etatik 14:00etara

Sari-banaketa

14:15

 

Parte hartuko duten taldeak:

Dortsala

Ikastetxea

 

1

CIFP MENDIZABALA LHII, Gasteiz

EUSKADI

2

SAN JUAN BAUTISTA "LA SALLE"

KANTABRIA

3

 CPIFP SOMORROSTRO LHIPI, Muskiz

EUSKADI

4

CPIFP OTXARKOAGA LHIPI, Bilbo

EUSKADI

5

CIFP BIDEBIETA LHII, Basauri

EUSKADI

6

CIFP IURRETA LHII, Iurreta

EUSKADI

8

IES MUNGIA BHI, Mungia

EUSKADI

9

CIFP SAN JORGE LHII, Santurtzi

EUSKADI

12

CIFP GIZARTE BERRIKUNTZA LHII, Hernani

EUSKADI

14

UROLA GARAIKO LANBIDE ESKOLA, Zumarraga

EUSKADI

16

CIFP FADURA LHII, Getxo

EUSKADI

17

CPIFP PEÑASCAL LHIPI, Bilbo

EUSKADI

19

CIFP NÚMERO UNO

KANTABRIA

20

IES FUENTE FRESNEDO

KANTABRIA

21

IES NTRA. SRA. DE LOS REMEDIOS

KANTABRIA

22

CIFP ANDRA MARI LHII, Galdakao

EUSKADI

23

CIFP ELORRIETA-ERREKAMARI LHII, Bilbo

EUSKADI

24

CIFP EMILIO CAMPUZANO LHII, Bilbo

EUSKADI

 

Talde gonbidatuak

Dortsala

Ikastetxea

A

Automotive Intelligence Center - Euskadi

B

Electric Car / Coche Cero - Euskadi

C

Hidrógeno 2ª Generación- Tknika - Euskadi

 

 

 

 

2 iruzkin
  • Argazkia SN Robot
    @tknika
    2024-05-24

    Comentario de X:
    Euskelec 2024 convertirá la Plaza de la Virgen Blanca en circuito de carreras, este domingo.
    @euskelec @ikaslanaraba @ikaslangipuzkoa
    @IkaslanBizkaia @HETELFP @AiceIzea
    https://t.co/5QvRuQwTnG

  • Argazkia SN Robot
    @tknika
    2024-05-24

    Comentario de X:
    Euskelec 2024 lehiaketak lasterketa-zirkuitu bihurtuko du Andre Maria Zuriaren plaza, igandean - Irekia
    @euskelec @ikaslanaraba
    @ikaslangipuzkoa
    @IkaslanBizkaia
    @HETELFP
    @AiceIzea
    https://t.co/1bcbJ600jv

Iruzkinak itxita daude dokumentu honetan
Ekitaldiko kargudunak
(XII legealdia 2020 - 2024)
Beste gonbidatu batzuk
  • Jon Labaka, Tknikako zuzendari exekutiboa