Eusko Jaurlaritzako Gobernu Kontseiluaren berriak
Eusko Jaurlaritzako Gobernu Kontseiluak bilera egin du aste honetan, eta erabaki batzuk
hartu ditu.
Bileraren ostean, Bingen Zupiria Eusko Jaurlaritzaren bozeramaileak, Beatriz
Artolazabal Berdintasun, Justizia eta Gizarte-politiketako sailburuak eta Jokin Bildarratz
Hezkuntzako sailburuak hartutako erabakien berri eman dute.
Emakumeen Aurkako Indarkeria Ezabatzeko Nazioarteko Eguna.
Bihar azaroaren 25a da, eta emakumeen aukako indarkeriarekin bukatzeko eguna
izango da.
Emakume baten kontrako beste indarkeri kasu larri baten berri izan dugu gaur, beste
behin, EAEn.
Bikote ohiak labankadaz eraso dio, eta oso larri dago ospitalean.
Zupiria sailburuak gaitzetsi egin du gertakaria, eta esan du oso garrantzitsua dela
lanean jarraitzean horrelakoekin bukatzeko eta emakumeen aurkako indarkeriarik
gabeko gizartea izateko.
Gobernu Kontseiluak erakunde-adierazpen bat onartu du azaroaren 25a dela eta.
Adierazpen horretan Eusko Jaurlaritzak konpromisoa hartu du jaurlaritzako sailekin eta
beste erakunde batzuekin lanean jarraitzeko helburu hauek lortzeko:
- Emakumeen aurkako indarkeriarik gabeko gizarte bat izateko urratsak egiteko.
- Indarkeriaren biktima diren emakumeei arreta egoki bat emateko.
Laguntzak itunpeko ikastetxeentzat, Covid-19ak eragindako gastuei aurre egiteko.
Eusko Jaurlaritzak 36 milioi euro baino gehiago emango die itunpeko ikastetxeei.
Ikastetxeek gastu gehiago izan dute koronabirusetik babesteko neurriak hartzeko.
Gastu hauei aurre egiten laguntzeko emango da dirulaguntza:
materialak, garbiketa, irakasle gehiago...
Eusko Jaurlaritzarentzat oso garrantzitsua da irakaskuntzak presentziala izaten
jarraitzea, eskolak ikasgelatan ematea eta segurtasun-baldintza egokiak edukitzea beti.
Gazteriaren Euskal Legearen proiektua.
Gobernu Kontseiluak Gazteriaren Euskal Legearen proiektua onartu du.
Lege izango den horren helburua da Eusko Jaurlaritzari eskumenak emango dizkion
arau bat edukitzea, EAEn gazteriari zuzendutako politikak egin daitezen.
Artolazabal sailburuak esan du gazteria balio handikoa dela gizartearentzat.
Eusko Jaurlaritzak politika bateratua egin nahi du, gazteei bizimodu independentea eta
familia-proiektua izatea errazagoa gerta dakien.
Horretaz gain, Euskadin egiten diren politika guztietan gazteen beharrak kontuan har
daitezen ere nahi du.
Eusko Jaurlaritzako sailak, Bizkaia, Araba eta Gipuzkoako Foru Aldundiak, eta EUDEL eta
gazteen elkarteak ari dira lantzen Gazteriaren Euskal Legean jaso beharreko neurriak.
Lege-proiektuan gazte izateko adina zein izango den ere jaso da: 12 eta 30 urte
bitartean.
