Eusko Jaurlaritzako Elikagai Politika eta Industriako Zuzendaritza arduratzen da Euskadiko nekazaritza- eta elikagaigintza-enpresen eta -industrien lehiakortasuna, berrikuntza eta iraunkortasuna bultzatzeaz, elikagaien balio-katea ekoizpenetik gastronomiaraino indartuz. Helburua da sektorearen garapena bultzatzea, enpresei laguntzea eta elikadura-eredu jasangarri, berritzaile eta kalitatezkoa bermatzea.

Bere eginkizunen artean, honako hauek nabarmentzen dira: sektorearen lehiakortasuna, modernizazioa eta enpresa-kudeaketa hobetzeko programak, plan estrategikoak eta laguntzak egitea eta gauzatzea, eta nekazaritzako elikagaien industriari lotutako erregistro ofizialak kudeatzea.

Zuzendaritzak, gainera, funtsezko zeregina betetzen du ikerketaren, garapen teknologikoaren eta berrikuntzaren esparruan (I+G+b), eta nekazaritza, zurgintza, elikadura eta gastronomia arloetako jarduerak koordinatzen ditu ikerketa-zentroekin, unibertsitateekin eta enpresekin lankidetzan. Ikertzaileen prestakuntza, emaitza zientifikoen aplikazio praktikoa eta Europako programetan parte hartzea sustatzen ditu, jasangarritasuna, elikagai-hondakinen murrizketa eta ekoizpen arduratsua bultzatuz.

Azkenik, Elikagai Politika eta Industriako Zuzendaritza lanean ari da nekazaritzako elikagaien sektorean belaunaldien arteko erreleboa eta ekintzailetza sustatzeko, jarraipena izan dezaten eta ekonomia- eta ingurumen-erronka berrietara egokitu daitezen. Era berean, laguntza teknikoa eta administratiboa ematen dio Nekazaritza eta Elikagaigintza Berritzeko Foroari, eta bere politikak garatzen ditu genero-berdintasunaren, euskararen erabileraren eta landa-ingurunearen garapen orekatuarekiko konpromisoaren printzipioen arabera.