Mikel Jauregi Industriako sailburua elkarrizketatu dute Radio Euskadin, eta, elkarrizketa horretan, gaurkotasun ekonomikoko zenbait gairen balorazioa egin du, hala nola Ameriketako Estatu Batuen merkataritza-politika, Talgo enpresari buruzko operazioa, industriarako laguntzak, Europako berrindustrializazio-prozesua edo energia berriztagarrien hedapena. "Munduko ziurgabetasun-egoerak zalantza eta erronka ugari sortzen ditu muga-zergen gerraren aurrean. Alabaina, Eusko Jaurlaritzak enpresei ziurtasuna ematearen eta laguntzearen alde eta inbertitzen jarraitzearen alde egin du. Industriari Laguntzeko 2025eko Plan berriaren bidez, 2.000 milioi euroko inbertsio publiko eta pribatua mobilizatu nahi dugu gure industria-sektorean".