Nire ardura Euskadiko Zibersegurtasun Agentziaren (Cyberzaintza) eta Agentziara atxikitako teknikarien jarduera zuzentzea da. Ardura horien barruan daude, besteak beste, Agentzia ordezkatzea, Agentziaren izenean hirugarrenekin harremanak formalizatzea (hitzarmenak, protokoloak edo dagozkion ekintzak), Agentziaren izenean kontratatzea, gastuak erabakitzea eta ordainketak agintzea, eta hori guztia indarrean dagoen legerian aurreikusitakoari jarraituz.

Gainera, aldian-aldian, proposamenak egingo dizkiet Cybertzaintzako gobernu-organoei, bereziki Administrazio Kontseiluari, hainbat alderdiri dagokienez, hala nola, Agentziaren jarduera planifikatzeko orientabide orokorrei, plan estrategikoari eta urteko kudeaketa-planei buruz, bai eta emaitzak ebaluatzeko proposamena ere. Urtero aurkeztuko dizkiot Administrazio Kontseiluari Agentziaren urteko aurrekontuaren aurreproiektua, plantillak eta lansari-erregimena, bai eta urteko memoria ere. Era berean, nire ardura izango da Administrazio Kontseiluaren erabakiak betetzea eta burutzea ere.

Hori guztia Agentziaren Administrazio Kontseiluak izendatu ahal izango dizkidan edo estatutuen arabera egokituko zaizkidan beste eginkizun batzuk alde batera utzi gabe.