Emakunderen arduradun modura nire ahalegin guztia Euskal Autonomia Erkidegoko politika, ekonomia, kultura eta gizarte alorretan emakume eta gizonen arteko berdintasun erreala eta eraginkorra lortzera bideratuta dago. Egon badaude oraindik lanean jarraitzeko esparruak: erakundeetan berdintasunaren aldeko egiturak finkatzea, emakumeen ahalduntzean eta baloreen aldaketan lana egitea, gizarte-antolaketa erantzunkidea bultzatzea, eta emakumeenganako indarkeriaren aurka borroka egitea, gure gizartean emakume eta gizonen arteko desberdintasunaren ezaugarririk bortitzena eta ikusgarriena baita indarkeria hori. Horiek dira Emakunden mahai gainean ditugun erronka batzuk eta horien alde ari gara lanean.