EHAAko xedapenak
Aldizkariaren data: 2016-11-30 Aldizkari honetan argitaratua: 2016228

EBAZPENA, 2016ko azaroaren 14koa, Universidad del País Vasco / Euskal Herriko Unibertsitateko Graduondoko Ikasketen eta Nazioarteko Harreman Arloko errektoreordearena, Euskal Herriko Unibertsitateko Zuzenbidearen Soziologian Nazioarteko master unibertsitarioaren ikasketa-plana argitaratzeko dena.

Xedapenaren data: 2016-11-14
Hurrenkenaren zenbakia: 201605103
Maila: Ebazpena
Apirilaren 12ko 4/2007 Lege Organikoak aldatutako abenduaren 21eko 6/2001 Lege Organikoak, Unibertsitateenak, 8.2 artikuluan dioenez, estatuko lurralde osoan balioa izango duten unibertsitateko titulu ofizialen ikasketak jarri eta kentzea autonomia erkidegoak erabakiko du, dela Gizarte Kontseiluaren ekimenez edo dela bere ekimenez eta kontseilu horren onespenarekin, betiere unibertsitateko Gobernu Kontseiluak aldeko iritzia emanda aurretik.
Ikasketa ofizialak ezartzeko prozedura honako hauek arautzen dute: urriaren 29ko 1393/2007 Errege Dekretuak, Unibertsitateko ikasketa ofizialen antolaketari buruzkoak, uztailaren 2ko 861/2010 EDk aldatuak (2010-07-3ko EHAA); eta urtarrilaren 20ko 11/2009 Dekretuak, Graduko, masterreko eta doktoregoko tituluetako ikasketa ofizialak jarri eta kentzeari buruzkoak.
Hezkuntza Ministerioko Unibertsitateen Kontseiluak, urriaren 29ko 1393/2007 Errege Dekretuko 25.7 artikuluari jarraituz eta jasota UNIBASQ/Euskal Unibertsitate Sistemaren Kalitate Agentziaren ebaluazio txostena, egiaztatu eta onartu egin du Euskal Herriko Unibertsitateak aurkeztutako Zuzenbidearen Soziologian Nazioarteko master unibertsitarioaren ikasketen proposamena.
Uztailaren 2ko 861/2010 Errege Dekretuak 26.3 artikuluan dioenez (2010-07-3ko BOE), gobernuak tituluaren izaera ofiziala behin onartuta, unibertsitateko errektoreak agindua emango du ikasketa-plana argitaratzeko bai Estatuko Aldizkari Ofizialean bai kasuan kasuko autonomia erkidegoko aldizkari ofizialean.
Hezkuntza, Hizkuntza Politika eta Kulturako sailburuaren 2016ko ekainaren 30eko Aginduaren bidez (2016-07-22ko EHAA), baimena eman zen Euskal Herriko Unibertsitateko master ikasketa ofizialak ezarri eta kentzeko; eta Ministroen Kontseiluaren 2016ko urriaren 7ko Erabakiaren bidez, haien izaera ofiziala onartu zen (Unibertsitateen Idazkaritza Nagusiaren 2016ko urriaren 14ko Ebazpenaren bidez argitaratutako Erabakia, 2016-10-26ko BOE).
Aipatutako guztiagatik, aplikatuta 1393/2007 Errege Dekretuko (861/2010 Errege Dekretuak aldatua) 26.3 artikulua, eta onartuta Zuzenbidearen Soziologian Nazioarteko unibertsitateko masterra, honakoa hau:
EBAZTEN DUT:
Argitara ematea Euskal Herriko Agintaritzaren Aldizkarian Euskal Herriko Unibertsitatean ematen den Zuzenbidearen Soziologian Nazioarteko master unibertsitarioaren ikasketa-plana. Ebazpen honen eranskinean zehazten den moduan.
Leioa, 2016ko azaroaren 14a.
Errektorea,
IÑAKI GOIRIZELAIA.
Eskuordetzez (2013ko urtarrilaren 30eko Ebazpena, 2013-02-13ko EHAA)
Graduondoko Ikasketen eta Nazioarteko Harreman Arloko errektoreordea,
NEKANE BALLUERKA LASA.