EHAAko xedapenak
Aldizkariaren data: 2016-11-18 Aldizkari honetan argitaratua: 2016219

157/2016 DEKRETUA, azaroaren 15ekoa, zeinaren bidez onartzen baita Gipuzkoako Peritu eta Ingeniari Tekniko Industrialen Elkargo Ofizialaren izendapenaren ordez hau jartzea: Industria Ingeniaritzako Gradudunen, Ingeniari Tekniko Industrialen eta Peritu Industrialen Gipuzkoako Elkargo Ofiziala.

Xedapenaren zenbakia: 201600157
Xedapenaren data: 2016-11-15
Hurrenkenaren zenbakia: 201604911
Maila: Dekretua
Euskadiko Autonomia Estatutuaren 10.22 artikuluak Euskal Autonomia Erkidegoari ematen dio honako eskumen oso hau: profesionalen elkargoen eta tituludun lanbideetan jardutearen arlokoa, betiere kontuan izanik Konstituzioaren 36. eta 139. artikuluetan xedatutakoa.
Gipuzkoako Peritu eta Ingeniari Tekniko Industrialen Elkargo Ofizialak eskabide bat aurkeztu zuen estatutuen aldaketa onar dakion, izendapena aldatu nahian, graduko titulazio berrietara egokitzeko xedez; izan ere, Boloniako prozesurako egokitzapenetan, lizentzien ordez graduak ezartzen baitira.
Tituludun lanbideei eta profesionalen elkargo eta kontseiluei buruzko azaroaren 21eko 18/1997 Legearen 28.2 eta 29.3 artikuluetan xedatuta dago ezen, profesionalen elkargoen izendapena aldatzeko, kasuan kasuko elkargo profesionalaren txostena behar dela, Eusko Jaurlaritzak dekretu bidez onartu behar duela, eta Euskal Herriko Agintaritzaren Aldizkarian eman behar dela argitara.
Euskal Autonomia Erkidegoko Peritu eta Ingeniari Tekniko Industrialen Kontseiluak eta Ekonomiaren Garapen eta Lehiakortasun Sailak horren aldeko txostenak eman eta aurkeztu dituzte. Horiekin batera, Herri Administrazio eta Justizia Sailaren txostena ere erantsi dute, bera baita eskuduna elkargo profesionalen arloan.
Horiek oinarritzat hartuta, elkargoak egindako eskabidea justifikatutzat jotzen denez gero, indarrean diren legeetan zehaztutako izapideak bete ondoren, Herri Administrazio eta Justiziako sailburuak proposatuta, eta Gobernu Kontseiluak 2016ko azaroaren 15ean egindako bilkuran aztertu eta onartu ondoren, honako hau
XEDATZEN DUT:
Artikulu bakarra.– Aurrerantzean, Industria Ingeniaritzako Gradudunen, Ingeniari Tekniko Industrialen eta Peritu Industrialen Gipuzkoako Elkargo Ofiziala izango da orain arteko Gipuzkoako Peritu eta Ingeniari Tekniko Industrialen Elkargo Ofizialaren izendapena.
AZKEN XEDAPENA
Dekretu hau Euskal Herriko Agintaritzaren Aldizkarian argitaratu eta hurrengo egunean jarriko da indarrean.
Vitoria-Gasteizen, 2016ko azaroaren 15ean.
Lehendakaria,
IÑIGO URKULLU RENTERIA.
Herri Administrazio eta Justiziako sailburua,
JOSU IÑAKI ERKOREKA GERVASIO.