Energia fotovoltaiko flotatzaileak Arabako Parke Teknologikoaren eraikin nagusiaren kontsumoaren % 30a sortzen du

Arabako Parke Teknologikoak energia fotovoltaiko flotatzailea sortzeko instalazio bat du, Miñaoko eraikin zentrala kontsumoaren % 30az hornitzen duena. EMICA Solar enpresak 2023an instalatutako planta horrek aurpegi biko 196 panel eta 106 kWp potentzia ditu, eta 104 tona CO2 isuri aurreztu ditu, baita baldintza klimatiko oso txarretan lan egin ere. Bere ekoizpena 35 etxetako kontsumo elektrikoaren parekoa da.

Trantsizio Energetikoko sailburuorde Irantzu Allendek parte hartu du EMICA solar startupak mota horretako sorkuntza-ekimenen hedapenaren aurkezpenean. Startup horrek Eusko Jaurlaritzaren finantza-laguntza jaso du, SPRI Taldeko Arrisku Kapitalaren Sozietate Kudeatzailearen bidez. Bere teknologia fotovoltaikoaren proba-fasearen ondoren, enpresak 500.000 euroko kapital-injekzioa jaso du, eta, horren bidez, konpainiak bere jardueran aurrera egiteko bigarren faseari ekin dio, 2025erako negozio-zifra boskoiztea aurreikusiz.

Allende sailburuordeak nabarmendu duenez, "sorkuntza planta mota berri honekin teknologia eta berrikuntza batzen dira trantsizio energetikoaren zerbitzura. % 100 "made in Euskadi" garapen teknologikoaz ari gara, Miñaoko urmaelatik leku handiagoetara jauzi egiteko aukera emango diguna".

Bestalde, Jon Ander Agirrebengoak, EMICAko zuzendari nagusiak, aipatu duenez, "Estatu osoan, ur gaineko energia fotovoltaikoaren ekoizpena 20 GW ingurukoa izan daiteke, eta Euskadin, berriz, Arabako Lautadako ureztatze-urmaelek soilik 40 MW-ko potentziala sortzeko dute".