Lehendakariak NBEko zuzendariak hartu ditu 2030 Agenda lortzeko funtsezko topaketa batean
- Lehendakariak NBEko agentzietako zuzendariak hartu ditu Lehendakaritzan, Euskadik 2030 Agendaren lokalizaziorako duen papera sendotzeko
- Bilbon ospatuko den nazioarteko bilerak Nazio Batuen 14 agentzia bilduko ditu garapen jasangarrirako estrategia giltzarriak definitzeko
- Euskadik 2030 Euskadi HUB-a sustatzen du, lankidetzazko gobernantzaren, kultura-aniztasunaren eta lokalizaziorako finantzaketaren arloan bere lidergoa sendotuta
Euskadik bere lidergoa sendotu du 2030 Agendaren lokalizaziorako, otsailaren 4tik 7ra bitartean ospatuko den Nazio Batuen Agentzien, Erakundeen eta Programen zuzendari eta arduradunen bigarren bilerarekin. Topaketa hau Bilboko NBEren Local 2030 Koalizioaren Idazkaritzaren egoitzan egingo da, eta Nazio Batuen 14 agentziatako zuzendariak bilduko ditu, helburu nagusia estrategiak lerrokatu eta Garapen Jasangarrirako Helburuen (GJH) lokalizaziorako-prozesuaren eragina sendotzea izanik.
Nazioarteko bilera honen baitan, Lehendakariak NBEko zuzendarien ordezkaritza bat hartu du gaur Lehendakaritzan, Euskadik GJHen lokalizaziorako egin duen ekarpenari balioa emateko. Bileran, funtsezko alderdiak jorratu dira, hala nola Euskadiren parte-hartzea Etorkizunerako Itunaren garapenean, euskal unibertsitate-sistemarekiko lankidetza Zientzia eta Ezagutzaren Sarearen (KSN) bidez, eta Euskadi erreferentzia gisa aitortzea lokalizaziorako-jardunbide egokietan.
Gainera, 2030 Euskadi HUB-a eratzearen onespena aurreikusten da, Euskadik lankidetzazko-gobernantza, kultura- eta hizkuntza-aniztasuna, lokalizaziorako finantzaketa eta gazteria eta formakuntza sustatzea bezalako arlo estrategikoetan izango duen papera indartzeko. HUB honek Euskadi eragile giltzarri gisa finkatzen du, agenda globalak eta tokiko beharrak konektatzeko bidean.
Local 2030 Koalizioak orain arte lortutako aurrerapenak ebaluatzeko ez ezik, 2025-2027 aldirako ibilbide-orri bat zehazteko ere balioko du Bilboko topaketak, sentsibilizazioan oinarritutako ikuspegi batetik konponbideen inplementazio eraginkor batera aurrera egiteko helburuarekin. Lan-agendak barne hartuko du lokalizaziorako integrazioa garapen jasangarrirako prozesu global handietan eta Nazio Batuen papera indartzea tokiko mailan.
Horrez gain, bilera hau aukera estrategikoa da Euskadik nazioarteko garapen jasangarrirako prozesuetan duen presentzia sendotzeko. Euskadik 2030 Agendarekin konpromiso sendoa erakutsi ez ezik, politika publiko berritzaileak aplikatzeko erreferente ere bihurtu da, tokiko beharrak helburu global handiekin konektatuz. Nazio Batuekin lankidetzak Euskadiren integrazioa sare nazioartekoetan sendotzea ahalbidetuko du, ezagutzen trukea erraztuz eta irtenbide eraginkorrak ezartzea sustatuz, trantsizio iraunkor eta bidezkoago baterantz azkartzeko.
