Emakundek irmo gaitzetsi du Barakaldoko emakume baten hilketa eta indarkeria matxistaren larritasuna eta egiturazko izaera gogoratu ditu

• Familia-testuinguruan gertatzen den indarkeria-kasu baten aurrean gaudela adierazi du, baina baita botere-harremanen eta emakumeen eta gizonen berdintasun ezaren testuinguruan
• Emakundeko zuzendariak herriko udalak gaur arratsalderako deitu duen elkarretaratzean parte hartuko du

Emakunde-Emakumearen Euskal Institutuak Barakaldon gertatutako emakume baten hilketaren aurrean bere gaitzespen irmoena azaldu du eta bere elkartasuna eta laguntza eskaini die eraildako emakumearen familiari eta gertukoei.

Emakundek abian jarri du kasu honetarako protokoloa eta herritarrei dei egiten die Barakaldoko Udalak gaur arratsalderako deitutako elkarretaratzean parte har dezaten. Emakundeko zuzendariak, Miren Elgarrestak, bertan parte hartuko du.

Emakumearen Euskal Erakundeak indarkeria matxistaren gogortasuna eta konplexutasuna gogorarazi ditu, baita hedatzeko, transmititzeko eta harreman mota desberdinetara egokitzeko duen gaitasuna ere. Kasu honetan, familia-testuinguruan gertatu den indarkeria-kasu baten aurrean gaude, baina baita botere-harremanen eta emakumeen eta gizonen arteko berdintasun ezaren testuinguruan.

Hala, Emakundek dei egiten dio gizarte osoari "jabetu gaitezen indarkeria matxistaren larritasunaz eta egiturazko izaeraz, eta matxismoa geldiarazteko beharraz, gizon batzuk bikotekideen edo euren amen borrero bihurtzen baititu, kasu honetan bezala". Halaber, gogorarazi du berdintasunaren alde lan egitea dela indarkeria matxista prebenitzeko biderik eraginkorrena eta herritar guztiak animatu ditu gaitzespena adieraztera, pertsona guztien inplikazioa ezinbestekoa baita emakumeen aurkako indarkeriarik gabeko gizartea lortzeko.