Eusko Jaurlaritzak Euskadiko garrantzi bereziko azpiegituren etorkizuneko erronkak aztertu ditu
Ertzaintzaren Erandioko egoitza nagusiak jardunaldi bat hartu du gaur, egungo egoera eta Euskadiko garrantzi bereziko azpiegituren egoera eta etorkizuneko erronkak aztertzeko.
PISE Gaurkotasuneko Gaien jardunaldiaren zazpigarren edizio honekin Euskadiko azpiegitura eta zerbitzu sentikorren babesaren zutabeetako bat indartuko da, lankidetza publiko-pribatua, hain zuzen ere. Jardunaldira planean aktiboki parte hartzen duten 50 operadoretik gora bertaratu dira, eta segurtasun integralaren ikuspegitik gai interesgarriak jorratu dira. Bertan, segurtasun fisikoarekin, logikoarekin eta lehen aldiz klima-aldaketarekin eta meteorologiarekin lotutako gaiak jorratu dira. Topagune horrek, gainera, aukera ematen dio euskal ekosistemari eragileen arteko lankidetza-sare batez eta etengabeko hobekuntzako eta oinarrizko eboluzioko eredu batez hornitzeko, funtsezko zerbitzuen eremuan sortzen ari diren arriskuei eta mehatxuei eraginkortasunez aurre egiteko.
Eusko Jaurlaritzako Segurtasuneko sailburu Bingen Zupiriak inauguratu du jardunaldia, eta bertan parte hartu dute, besteak beste, Segurtasuna Koordinatzeko zuzendari Asier Erkorekak, Ertzaintzako zuzendari Victoria Landak eta Cyberzaintzako zuzendari Javier Dieguezek, bai eta Euskadin funtsezko zerbitzuak ematen dituzten erakunde publiko eta pribatuetako ordezkariek ere.
