Javier Hurtado sailburua: “Euskadik bertan bizi direnentzat izan behar du, eta hori da bisitatzen gaituztenek ikusi nahi duten Euskadi”

Turismo, Merkataritza eta Kontsumoko sailburu Javier Hurtadok galdera honi erantzun dio gaur Eusko Legebiltzarrean: “Zer balorazio egiten du sailburuak turismoaren sektoreak herritarrei sortzen dien kezka gero eta handiagoaren gainean, kontuan hartuz sektore horrek zer nolako garrantzia duen ekonomiarentzat, enpleguarentzat eta Euskadiko biztanleriarentzat?” Sailburuak zera azaldu du, turismoaren inguruan bizitzen ari garen paradigma-aldaketaz jabetzen dela, fenomeno globala dela, eta Turismo Saila horretan lanean ari zela jada joan den udaz geroztik fenomeno hau areagotzen hasi baino lehen.

 “Turismoak, industria guztiek bezala, kanpo-eragin positiboak eta negatiboak ditu. Eta Turismo Sailean ildo estrategiko argiak ezarri ditugu: kanpo-efektu negatiboei aurre egitea eta turismoaren kanpo-efektu positiboak indartzea. Kanpo-efektu positiboek 110.000 familia baino gehiagoren lana babestea dakarte, hau da, Euskadiko enpleguaren % 11, beren negozioak eta bizitza garatu ahal izan dezaten. Eta 110.000 enplegu horiek eragina dute beste sektore batzuetan ere, eta, beraz, oso beharrezkoak dira haientzat. Merkataritzaz, ostalaritzaz, garraioaz edo kulturaz ari naiz. Eta, era berean, badakigu kanpoko efektu negatiboak ere badituztela, eta, hortaz, horien aurrean borrokatzen jarraituko dugu. Horretarako, turismoari buruzko lege berri bat eta erabilera turistikorako etxebizitzen ikuskapena eta kontrola indartuko duten tresna berriak ezarriko dira. Bai eta egonaldi turistikoen gaineko zerga bat ere, Euskadiz gozatzera datozenek hura hobetzen lagun dezaten”, azaldu du.

Alde horretatik, sailburuak zera azpimarratu du: “Hainbat estrategia lantzen aritu gara desestazionalizazio, fluxuen mugimendu, oreka eta iraunkortasunaren gainean. Horregatik, gure hazkundea handiagoa da udako hiletatik kanpo; izan ere, 2023an % 12ko hazkundea izan zen udatik kanpo eta % 2,8 udan; eta aurtengo urtean % 4ko hazkundea izan da ekainera arte, eta % 1,2koa udan.

Bizitzeko moduko helmugak nahi ditugu gure herritarrentzat, eta badakigu bisitatzen gaituztenek ere Euskadin helmuga berezi bat bilatzen dutela, gure ohiturak eta kultura zainduko dituena. Funtsean, Euskadik bertan bizi denarentzat izan behar du, bai, eta hori da bisitatzen gaituztenek ikusi nahi duten Euskadi”, esanez amaitu du.