Herri Dirubideen Euskal Kontseilua

Gaur egindako Herri-Dirubideen Euskal Kontseiluan aztertutako gaien artean, honako hauek nabarmentzen dira:

2024ko ZERGA ITUNDUEN ONDORIOZKO DIRU-BILKETAREN ITXIERA-AURREIKUSPENAK

2024ko zerga-bilketaren aurreikuspena oso positiboa izango zen, baldin eta, Auzitegi Gorenaren epaiari jarraituz, 1979ko urtarrilaren 1a baino lehen mutualitateetara kotizatu zuten pentsiodunei egindako itzulketen eraginagatik izan ez balitz. Itzulketa horiek 2024ko diru-bilketan eragin handia izan duten arren (800 milioi euro inguru hiru lurraldeetarako), diru-bilketa zertxobait handitu da 2023koarekin alderatuta. Edonola ere, hiru Foru Aldundiek kaudimena erakutsi dute, eta gai izan dira pentsiodunentzako 2023ko eta preskribatu gabeko itzulketen kontuak eguneratzeko. Horrela, 2024rako diru-bilketaren itxiera-kalkuluaren arabera, duela urtebete aurreikusitako diru-bilketaren % 96,3 egikaritu da (699,3 milioi euro gutxiago).

Horrekin guztiarekin, gaurko bileran, 2024ko ekitaldirako zerga itundu bidezko diru-bilketaren zenbatekoa likidatzeko aurreikuspenak onartu dira, 18.300,9 milioi euro.

2025erako ZERGA ITUNDU BIDEZKO DIRU-BILKETAREN AURREIKUSPENAK

Termino absolutuetan, kalkulatzen da foru-aldundiek 2025ean guztira 19.718,6 miloi euro bilduko dituztela zerga itunduen bidez.

Diru-bilketaren hazkundea 2024ko aurrekontua baino ehuneko 3,8 puntu handiagoa izatea aurreikusten da. Aurreikuspen hori 2024ko diru-bilketaren benetako itxieraren aurreikuspena baino % 7,7 handiagoa da. Urte arteko konparazioan, pentsiodunei egindako diru-itzulketetatik datorren urtean finkatzen ez den zatia alde batera uzten bada, 2025eko zerga-sarreren aurrerapena, itxierako aurreikuspenarekin alderatuta, eta euskal ekonomiak urte horretarako aurreikusitako hedapena antzekoak izango lirateke. Eusko Jaurlaritzak egindako koadro makroekonomiko berriaren arabera, barne-produktu gordin nominala % 4,3 handituko da 2025ean.

FORU ALDUNDIEK EUSKO JAURLARITZARI 2025erako EGIN BEHARREKO EKARPENAK ETA KOEFIZIENTE HORIZONTALAK

Foru-aldundiek erakunde komunei 2025erako egin beharreko ekarpenak guztira 13.200 milioi eurokoak izatea adostu da, honako ekarpen-koefiziente horizontal hauen arabera: % 16,04 Araba, % 50,37 Bizkaia eta % 33,59 Gipuzkoa.

EGOKITZAPENERAKO FUNTS OROKORRAREN 2025erako BEHIN-BEHINEKO ZEHAZTAPENA

Egokitzapenerako Funts Orokorraren 2025erako aurreikuspena 178 milioi eurokoa da. Funts horren finantzaketaren % 70,81 Eusko Jaurlaritzari dagokio, eta gainerakoa, % 29,19, Foru Aldundiei. Funts hori Arabako eta Gipuzkoako Lurralde Historikoen artean banatuko da, eta horiei behin-behinean 100,4 milioi euro eta 77,6 milioi euro dagozkie, hurrenez hurren.

AURREKONTU-EGONKORTASUNARI ETA FINANTZA-JASANGARRITASUNARI BURUZKO ERAKUNDEARTEKO AKORDIOA

Foru Aldundi guztientzako berezko defizit-helburu bat aitortzeari dagokionez 2020tik aurrera sortutako egoera berria sendotu ondoren, eta haien eskubide historikoen arabera dagozkien eskumenak aintzat hartuta, Kontseiluak erabaki du, irauteko xedearekin, aurrekontu-egonkortasunaren eta finantza-jasangarritasunaren helburuak Lurralde Historikoen artean banatzeko irizpidea. Hori dela eta, onartu den erabakiak aurreikusten du, arau orokor gisa, Euskal Autonomia Erkidegoak eta Estatuko Administrazioak foru-aldundien defizit-helburua adosten dutenean, baterako defizit-helburu horren Foru Aldundien arteko lurralde-banaketa ekitaldi bakoitzerako onartutako ekarpen-koefiziente horizontalen arabera egingo dela.