Ikasiker beketarako deialdia, ikerketa lanetan lagundu nahi duten unibertsitate-ikasleentzat (Gobernu Bilera 2024-06-11)
Hezkuntza Sailak 330.000 euro bideratu ditu ikasturtean zehar edo uda garaian burutu daitezkeen lankidetza hauetarako
Ikasle bekadunek euskal ikerketa sistemako zentroetan eman ahal izango dute laguntza
Gobernu Kontseiluak gaurko bileran onartu du, Hezkuntza sailburuak proposatuta, ikerketa lanetan laguntzeko Ikasiker beken deialdia egiten duen Agindua, 2024-2025 ikasturterako. Hezkuntza Sailak 330.000 euro bideratzen ditu deialdi honetarako.
Hezkuntza Sailaren Ikasiker programaren helburua da unibertsitate ikasleei aukera ematea euskal ikerketa-sisteman egiten den oinarrizko ikerketaren eta ikerketa aplikatuaren arloan lehen urratsak egiten has daitezen.
Unibertsitate ikasleei zuzenduta deitzen dira Ikasiker bekak, ikasketekin aldi berean (2025eko urtarrilaren 1etik irailaren 30era bitartean) honako ikerketa talde hauetan laguntza emateko prest dauden ikasleentzat: Euskal Unibertsitate Sistemaren ikerketa taldeetan, Oinarrizko Ikerketa eta Bikaintasun Zentroetan (BERC), Ikerketa Sanitarioko Institutuetan (ISI), Ikerketa Kooperatiboko Zentroetan (IKZ) edo Zientzia, Teknologia eta Berrikuntzaren Euskal Sareko zentro teknologikoetan, betiere BRTA partzuergo zientifiko-teknologikoari atxikita badaude eta Eusko Jaurlaritzak onetsitakoak eta Zientzia, Teknologia eta Berrikuntzaren Euskal Sareko agente gisa egiaztatutakoetan.
330.000 euroko diru-kopuruarekin, 190 beka eskainiko dira, honako modalitate hauetan:
- A modalitatea: ikasturtean zehar burutzeko beka, 2025eko urtarrilaren 1etik ekainaren 30era. 150 beka eskaintzen dira modalitate honetan.
- B modalitatea: 2025eko udan burutzeko beka, ekainaren 1etik irailaren 30era. 40 beka eskaintzen dira modalitate honetan.
Beka hauek eskuratu nahi dituzten ikasleek unibertsitateko Graduko titulazio ofiziala lortzera bideratutako ikasketa-plan bateko azken bi urteetako batean matrikulatuta egon beharko dute. B modalitatearen kasuan, Master ofizialeko ikasleak ere izan daitezke. Bekaren onuradun izateko, Euskadin izan beharko dute administrazio-egoitza, eta lankidetza proiektu bat aurkeztu, lankidetza hori gauzatu nahi den ikerketa zentroak behar bezala ziurtatua.
Deialdi honetara eskaerak aurkezteko epea Agindua EHAAn argitaratu (ekainaren amaieran edo uztailaren hasieran) eta hurrengo egunean irekiko da, eta 2024ko irailaren 16an itxiko da.
