Berriak Ekonomiaren Garapena, Jasangarritasuna eta Ingurumena
qrcode

Zabalik dago herritarrak krisi klimatikoaren aurrean ahalduntzeari buruzko 2024ko Ingurumen Komunikazioaren Eskolan izena emateko epea

2024-06-06
  • Ihobe – Eusko Jaurlaritzaren Ingurumen Jarduketarako Sozietate Publikoak eta APIA – Ingurumen Informazioko Kazetarien Elkarteak antolatuta, eskola 2024ko irailaren 12an egingo da, Donostiako Miramar Jauregian, Euskal Herriko Unibertsitatearen (UPV/EHU) Uda Ikastaroen eta Donostia Sustainability Forum foroaren esparruan
  • Seigarren edizioak energia- eta klima-trantsizioaren aurrerapenean laguntzen duten profesionalekiko elkarrizketen formatu baterantz eboluzionatzen du, eta kontakizuna aldatzearen ikuspegian sakontzen du, ingurumen-gaiak gehiago eta hobeto komunikatzeko
  • Programak bi saio praktiko izango ditu: Santa Klara uhartea eta Hondalea itsasontziz bisitatzea, eta Klimaren Murala elkarrekin sortzeko tailerra

 

Ingurumen Komunikazioaren Eskolaren seigarren edizioak badu data: 2024ko irailaren 12an egingo da, Donostiako Miramar Jauregian. Jardunaldia telematikoki ere jarraitu ahal izango da. APIA Ingurumen Informazioko Kazetarien Elkarteak eta Ihobe Eusko Jaurlaritzaren Ingurumen Jarduketarako Sozietate Publikoak antolatuta, Euskal Herriko Unibertsitatearen (UPV/EHU) Uda Ikastaroen eta Donostia Sustainability Forum foroaren esparruan, krisi klimatikoaren eta beste ingurumen-erronka batzuen aurrean herritarrak ahalduntzea gaia jorratuko da.

Edizio honen helburua hausnarketarako gune bat sortzea eta biodibertsitatearen galerari, natura-ingurunearen kontserbazioari, ekonomia zirkularraren ezarpenari eta garapen jasangarriari buruzko gakoak eskaintzea da. Horretarako, Eskola birmoldatu eta eboluzionatu egiten da energia- eta klima-trantsizioan aurrera egiten eta ingurumen-gaiak gehiago eta hobeto komunikatzen laguntzen ari diren profesionalekin elkarrizketa inspiratzaileak sortzeko.

Elkarrizketa horiek bi esperientzia praktikorekin osatzen dira: Santa Klara uhartea eta Hondalea itsasontziz bisitatzea, ikastarora bertaratzen diren pertsonentzat, eta Klimaren Murala elkarrekin sortzeko tailer bat egitea, bide telematikoz parten hartzen dutenentzat.

 

Elkarrizketarako eta hausnarketarako gune bat

Ingurumen-arloko profesional eta espezialistak herritarrak klima-ekintzara nola mugitu edo krisi klimatikoari eta beste ingurumen-erronka batzuei nola aurre egin hausnartzeko gune bihurtuko den programa baten protagonista izango dira, eta ingurumen-komunikaziorako formatu, euskarri eta kanal berrietan sakonduko dute.

Eskolako zuzendarikideak — APIAko presidente María García de la Fuente eta Ihobeko Komunikazio Estrategikoko arduradun Yolanda D. Rodríguez— izango dira irekiera-ekitaldiko buru. Ekitaldi hori amaituta, mahai-inguru batzuk egingo dira. ‘Estamos a tiempo’ izenburua daraman lehenengo mahai-inguruan, Javier Peña dibulgatzaile zientifikoak eta Fernando Valladares CSICeko zientzialari eta Rey Juan Carlos Unibertsitateko irakasleak hartuko dute parte, eta Adela Úcar kazetariak —gaur egun TVEko La2-eko "Reduce tu huella" saioko aurkezlea— dinamizatuko du.

Ondoren, herritarren ekintza bultzatzea komunikatzeko moduari buruzko mahai-ingurua egingo da. Bertan, Yayo Herrerok —aholkularia, ikertzailea eta irakaslea— eta Asunción Ruizek —SEO/BirdLife-ko zuzendari exekutiboa— hitz egingo dute, “El Asombrario” hedabide digitalaren buru den ingurumen-arloko kazetari Rafael Ruizek moderatuta.

Ondoren, Euskadin herritarren batzarra eta klimaren aldeko ituna sustatzeko erronkaz hitz egingo da. Mari Mar Alonso eta Mari Luz Gómez, Ihoberen Klima Ekintzaren zuzendaria eta Herritartasun proiektuaren arduraduna, hurrenez hurren, arduratuko dira horretaz. Goizeko saioa Naiara Goiak itxiko du, Arantzazulab Gizarte Berrikuntzako Laborategiko zuzendari nagusiak. Bere hitzaldia ‘Demokrazia indartzeko eta herritarrak ahalduntzeko berrikuntza-ikuspegietan’ oinarrituko da.

APIAko ingurumen-kazetari Luis Guijarrok aipatuko dituen goizean ateratako ondorioen ondoren, arratsaldean tailer praktiko batekin eta esperientzia batekin osatuko da programazioa. Eskolan modu presentzialean parte hartzen dutenek Santa Klara uharteko eta bertan dagoen Hondaleko ingurune natural eta artistikoa bisitatuko dute itsasontziz, Cristina Enea Fundazioari esker. Telematikoki parte hartzen duten pertsonek, bestalde, Adesio aholkularitzako Stéphane Kosinskiren eskutik, Klimaren Murala elkarrekin sortzeko tailer batean parte hartuko dute.

Saioak osatzeko, UPV/EHUren Uda Ikastaroetan parte hartzen duten pertsona guztiek Miramar Jauregian "Klima aldaketa, hau komeria" erakusketa ikusteko aukera izango dute. Ballena Blanca izeneko ingurumen-aldizkariak sortu du erakusketa, eta, bertan, mundu osoko bineta-egileek osasunean, ingurumenean, ekonomian edo nekazaritzan, besteak beste, eragina duen arazo larri horren ikuspegi berezia erakusten dute.

 

Eskolari buruz

Ingurumen Komunikazioaren Eskola Euskal Herriko Unibertsitatearen Uda Ikastaroen programazioan jasotako jardueretako bat da, eta Donostia Sustainability Forum foroaren parte ere bada. Foro horrek jasangarritasuna diziplinartean lantzen du, gizartearen, ingurumenaren eta ekonomiaren ikuspegitik.

Ihobe – Eusko Jaurlaritzaren Ingurumen Jarduketarako Sozietate Publikoak eta APIA – Ingurumen Informazioko Kazetarien Elkarteak antolatutako Ingurumen Komunikaziorako Eskola eztabaida-foroa da, eta komunikazioak ekintzara mobilizatzeko duen zeregina aldarrikatzen du. 2019ko lehen edizioan, krisi klimatikoaren komunikazioan jarri zen arreta; bigarrenean, biodibertsitateari eta ondare naturalari buruzko komunikazioa jorratu zen; hirugarren edizioan, 2021eko irailean, energia- eta klima-trantsizioa landu zen; laugarrenean, krisi klimatikoaren, ekosistemen kontserbazioaren eta pertsonen osasunaren arteko erlazioa jorratu zen; eta aurreko edizioan, ingurumen-gaiak gazteekin eta gazteentzat nola komunikatu aztertu zen.

 

Izena emateko epea zabalik dago eta hurrengo estekan sartuta egin daiteke: https://www.uik.eus/es/curso/escuela-comunicacion-ambiental-2024-conversaciones-empoderar-ciudadania

 

2 iruzkin
  • Argazkia Xaver
    2024-06-08

    Lehia desleiala izan daiteke tokietako ekonomiak deskarbonizatzea eta, ondoren, petrolio merkearekin diruz lagundutako produktuak beste leku batzuetatik ekartzea, hala nola tokiko ekonomiekin amaitu nahi izatea, gero, hondamendiak garaiz gertatzen ez badira, espekulazioan merkeago erosteko, kutsadurak modu globalean eragiten duenean.

  • Argazkia Xaver
    2024-06-08

    Puede suponer competencia desleal descarbonizar economías en lugares y luego traer productos subvencionados con petróleo barato de otros lugares, como que se quisiera acabar con economías locales para luego si los desastres no acontecen en tiempo, comprar más barato en la especulación cuando la contaminación afecte de manera global.

Iruzkinak itxita daude dokumentu honetan