Berriak Segurtasuna
qrcode

Eusko Jaurlaritzak eta Euskadiko Gurutze Gorriak lankidetza-hitzarmen berria izenpetu dute larrialdien eta babes zibilaren arloan (Gobernu Bilera 2024-06-04)

2024-06-04
  • Gurutze Gorria Larrialdiei Aurre Egiteko Euskal Sistemara atxikita dagoen boluntario erakundeetako bat da, eta esperientzia handia du Euskadin babes zibilaren eta herritarrei laguntza ematearen arloan 

Gobernu Kontseiluak oniritzia eman dio Euskadiko Gurutze Gorriarekin larrialdien eta babes zibilaren arloan lankidetza-hitzarmen berri bat sinatzeari, eta ekimen horrek bi aldeek 2019an sinatu zuten eta orain indarrean dagoen akordioa eguneratzea ekarriko du. Dokumentu horri esker, Euskadiko Gurutze Gorriaren Batzorde Autonomikoaren programak eta ekintzak hobeto koordinatu ahal izango dira Larrialdiei Aurre Egiteko Sistemarenekin, indarrean dagoen araudiarekin eta erabilgarri dauden giza eta material baliabideekin bat etorriz.

Hitzarmen berriaren bitartez, 1995az geroztik egin den bezala, Segurtasun Sailak erakunde horren Urteko Jarduera Programan jasota dauden zereginak finantzatuko ditu dirulaguntza izendun gisa, eta 2024ko ekitaldian dirulaguntza hori 471.600 eurokoa izango da. Berez, zenbateko hori izango da erakunde horrek lurraldearen eta kostaldearen jarduera-eremuetan hartzen dituen konpromisoak betetzeko gastuak finantzatzeko.

Larrialdi-egoeretan mobilizatzeko Eusko Jaurlaritzako Larrialdiei Aurre Egiteko eta Meteorologiako Zuzendaritzaren esku jartzen diren Gurutze Gorriaren bitartekoak eta baliabideak aurreikusitako urteko jarduera-programan zehaztuko diren arren, besteak beste, esku-hartze psikosozialarekin, lehorreko eta barruko uretako bilaketekin eta salbamenduarekin, osasun-laguntzarekin eta itsas salbamenduko baseekin lotutako larrialdietan berehala erantzuteko taldeak izango dira.

Azken batean, hitzarmen berriak bi alderdien arteko lankidetza antolatu nahi du, arrisku kolektibo larria, hondamendia, zorigaitz publikoa eta abar gerta daitezkeen egoeretan, erakunde horren giza baliabideen erabilera optimizatzen saiatuz, baita horretarako ematen zaizkien baliabide eta ekipamendu materialena ere, eta, aldi berean, arriskuak eta euskal herritarrek horrelako egoeren aurrean hartu beharreko neurriak hobeto ezagutzeko beharrekotzat jotzen diren babes zibilaren arloko gomendioak eta aholkuak zabaltzeko baterako konpromisoa islatuz.

Urteko programa babes zibileko planetan eta taktika operatiboetan xedatutakoari egokituko zaio, bai eta Eusko Jaurlaritzako Larrialdiei Aurre Egiteko eta Meteorologiako Zuzendaritzak, dirulaguntza kudeatzeaz arduratzen den erakundea izanik, ezarritako irizpide orokorrei eta lehentasunei ere.

Oraindik ez dago iruzkinik
Iruzkinak itxita daude dokumentu honetan
Komunikabideek behera kargatzeko