Berriak Ekonomia eta Ogasuna
qrcode

Euskal ekonomia hazkunde sendoko eremura hurbildu da apirilean

2024-05-08

Apirilean ia zazpi puntu hobetu izanak, 91,4ko balioan kokatuta martxoaren 84,5ekoaren aldean, hazkunde sendoko eremura hurbiltzeko aukera ematen dio euskal ekonomiari. Hain zuzen, 100 puntutik aurrera dago finkatuta eremu hori. Izan ere, joan den hilabetean lortutako balioak berekin ekarri du euskal ekonomiak duela urtebeteko egoera ia berreskuratzea, 2023ko apirilean 93,5 puntuko balioa finkatu baitzen. Hala jasotzen da Ekonomia eta Ogasun Sailak egindako termometroan.

Hobekuntza hau hainbat adierazle ekonomikotan oinarritzen da. Bai kontsumo pribatuak, bai publikoak, aurreko hilabeteetako indarrari eutsi diote, eta, inbertsioaren hazkundea leunagoa bada ere, kanpo-saldoak hobera egin du.

Aipamen berezia merezi du Euskadiren industria-produkzioaren indizeak (IPIak) martxoan, azken hilabeteetako joera hausten duelako eta sektorearen perspektibak hobetzen dituelako. Hilabete horretan, IPIa % 2,0 igo zen aurreko urteko aldi beraren aldean. Bilakaera horren ondorioz, IPIak erregistrorik onena ezarri zuen 2008ko martxoan, osagai guztiak gorantz zituela, kontsumo-ondasun iraunkorrak eta energia salbuetsita.

Era berean, martxoan euskal ekonomiak izandako hobekuntza horri gehituta, zerbitzuek hazkundea eta enplegua bultzatzen jarraitzen dute.

Euskal ekonomia hazkunde leuneko eremuan sartu zen 2023ko martxoan, 98,2 puntuko balioarekin, hazkunde sendoko eremua utzi ondoren, 100 punturen azpitik geratu baitzen.

Termometroa hilero egiten da, euskal ekonomiaren 100 adierazletik gora oinarri hartuta, eta hilabete bakoitzaren lehen egunetan argitaratzen da.

Oraindik ez dago iruzkinik
Iruzkinak itxita daude dokumentu honetan