qrcode

Martxoko termometroaren adierazle ekonomikoak, otsailera arteko enpresen eraketa eta KPIaren hamarren bateko gorakada jasotzen ditu gaur Astekonomiak

2024-04-12

Astekonomiak euskal ekonomiaren termometroan jarri du fokua gaur, martxoan urteko baliorik handiena lortu baitzuen. Halaber, urteko lehen bi hilabeteetan eratutako enpresen kopurua eta martxoko KPIa jasotzen ditu asteko adierazle ekonomiko garrantzitsuenen laburpen honek entrega berri honetan.

Martxoan, EAEko ekonomiaren termometroak 84,5 puntuko balioa lortu zuen. Hala, beste hilabetez hazkunde leuneko eremuan jarraitu zuen. Zehazki, 2,5 puntu igo zen otsailaren aldean, zerbitzuen une onari esker. Hain zuzen, zerbitzuak izan ziren, berriz ere, euskal ekonomiaren sektore dinamizatzailea. Era berean, erritmo onean sortu zen enplegua.

Bestalde, 2024ko lehen bi hilabeteetan, Euskadin 682 enpresa berri eratu ziren, aurreko urteko aldi berean baino % 23,1 gehiago. Zehazki, 2014tik lortutako baliorik handiena da. Halaber, urtarrila eta otsaila bitartean kapital nabarmen handia ordaindu zen, 72 milioi eurotik gorakoa.

Orobat, INEk argitaratutako informazioaren arabera, martxoan Euskadiko KPIa % 3,2koa izan zen, aurreko datuaren hamarren bat gainetik. Aitzitik, azpiko inflazioa puntu erdi jaitsi zen, eta orain % 3,4an dago, azken bi urteetako baliorik baxuenean.

Oraindik ez dago iruzkinik
Iruzkinak itxita daude dokumentu honetan
Komunikabideek behera kargatzeko