Tabako Kerik Gabeko Euskadi
Berriak Segurtasuna
qrcode

Euskalmeten arabera, otsaila oso beroa eta oso hezea izan da

2024-03-04
  • Hileko batez besteko tenperatura normala dena baino 2,5 ºC altuagoa izan da, batez ere hilaren 22ra arte nagusi izan diren egun beroen ondorioz
  • Ordutik aurrera nagusitu zen negu-giroak prezipitazio oso ugariak, ibaiek gainezka egitea eta tarteko mailetan elurra egitea eragin zituen

Euskalmet – Euskal Meteorologia Agentziaren arabera, otsaila oso beroa eta oso hezea izan da Euskadi osoan. Tenperaturaren kalifikazioa, batez ere, otsailaren 22ra arte nagusitu ziren balio altuen ondorio da, eta hilabete osorako 2,5 ºC-ko anomalia positiboa ezarri dute. Otsailaren 22an, neguko eguraldia nagusitzearekin batera, gertatu zen aldaketaren ondorioz, eta erregistratu ziren prezipitazio ugarien arabera, otsaila oso hezea izan da, eta Euskadiko ibai askok gainezka egin dute eta elurra egin du tarteko mailetan.   

Euskalmeten arabera, otsaileko batez besteko tenperaturak 12-13 ºC inguruan ibili ziren itsasertzean, eta Arabako Lautadan, berriz, 7-8 ºC-ra hurbildu ziren. Hilaren hasieratik 22ra bitartean, nabarmen nagusitu ziren egun epelak, eta anomaliak esanguratsuak izan ziren, kasu batzuetan 8 ºC eta 12 ºC inguru batez bestekoaren gainetik. Horrela, aipatzekoak dira hilaren 13an eta 15ean erregistratu ziren tenperatura altuak (Oleta 27,2 °C; Muxika 26 °C), bai eta goizaldeko tenperatura minimoak ere (Higer 21 °C; Oiartzun 19,4 °C). Izotz-egunen kopuruari dagokionez, batez besteko klimatologikoaren azpitik geratu da, eta aipatzekoa da hilabete osoan ez zuela izotzik egin Arabako Lautadan.

Tenperatura horiekin batera izan den intsolazioa ohikoa baino txikiagoa izan da kostaldean, eguzki-orduak % 11 gutxiago izan baitira, eta isurialde mediterraneoan, aldiz, intsolazioa ohikoa baino handiagoa izan da, eta, adibidez, Arabako Lautadan eguzki-orduak % 5 gehiago izan dira eta Arabako Errioxan % 20 gehiago. Hiriburuz hiriburu, Bilbok 86 eguzki-ordu izan zituen, Donostiak 95 eta Gasteizek 113.

Prezipitazioari dagokionez, eta hilaren 22tik aurrera izandako eguraldi-aldaketaren ondorioz, otsailean erregistratutako prezipitazio-kopuruen arabera hilabetea oso hezea izan dela esan daiteke. Prezipitazio gehien ohiko lekuetan metatu zen (Eskas 419,8 l/m²; Ibai Eder 319,7 l/m²), eta baliorik baxuenak Arabako Errioxan erregistratu ziren (Moreda 57,8 l/m²). Euskadiko barnealdeko leku askotan normala dena baino % 70-% 100 euri gehiago egin du. Bestalde, elurra behin baino gehiagotan egin zuen tarteko eta goiko mailetan, baina geruza esanguratsurik metatu gabe. Kalifikazio horrekin bat etorriz, euri-egunen kopurua normala dena baino handiagoa izan zen: 14 egun isurialde kantauriarrean eta 11 isurialde mediterraneoan.

Hilaren 26an eta 27an erregistratutako euriak otsaileko egun bateko eguneko prezipitazio maximoaren errekor batzuk hautsi zituen Gipuzkoako eta Arabako hainbat lekutan (Berastegi 107,6 l/m²; Ordunte 75,5 l/m²), eta Kadagua, Deba, Urola, Oria eta Zadorra ibaien arroek gainezka egin zuten.

Muturreko meteorologiari dagokionez, otsailean zehar Eusko Jaurlaritzak 10 alerta laranja aktibatu zituen, horietatik 2 prezipitazio iraunkorrengatik, 2 haizeagatik haizeguneetan, 4 olatuen altueragatik nabigaziorako eta 2 kostako inpaktuagatik. Horrez gainera, 39 abisu hori ere aktibatu zituen.

Oraindik ez dago iruzkinik
Iruzkinak itxita daude dokumentu honetan
Komunikabideek behera kargatzeko
Ekitaldiko kargudunak