Lehendakariordeak enpresetan dauden aukeren aldeko apustua egiten du, aurrerapen ekonomikoari eta gizarte-kohesioari lagunduko dioten langileak erakartzeko eta horietan parte hartzeko.

• Mendiak Txemi Cantera saria eman dio Comparte sareari, eta azpimarratu du lankidetzaren alde egiten duela inor enplegu-aukerarik gabe gera ez dadin.

Idoia Mendia Lehendakariorde eta Lan eta Enpleguko sailburuak "gizarte osoari onurak ekarriko dizkioten eta aurrerapen ekonomikoari eta gizarte-kohesioari lagunduko dioten alternatiba solidario eta partekatuak eskaintzearen" aldeko apustua egin du gaur, eta uste du ez dagoela beste biderik "gizarte zuzen batentzat, ezta aurrean ditugun erronka eta trantsizio guztiei aurre egiteko ere".

Mendiak gaur parte hartu du Bilbon Gizarte Ekonomiaren Nazioarteko Txemi Cantera Saria Comparteri emateko ekitaldian. Sare horrek Latinoamerikan eta Kariben lan egiten du, eta "lankidetza-moduak bilatzen ditu inor gera ez dadin enplegu-aukerarik gabe, etorkizun hobeko aukerarik gabe", eta ASLErekin, Lan Sozietateen eta Enpresa Partaidetuen Elkartearekin eta sariaren sustatzailearekin partekatzen du onura komun bat lortzeko balio-komunitate bat izateko espiritua.

Bere hitzaldian, Lehendakariordeak gogorarazi du duela hiru urte "hitz asko egin genuela lankidetzaz, guztion onerako ahalegin partekatuaz, langileek enpresetan duten konpromisoaz, eta gobernuek enplegua eta enpresak babesteko duten ezinbesteko inplikazio publikoaz". “Eta arrisku-egoera bakoitzean”, gaineratu du, "errezeta bera aplikatu dugu, lankidetza handiago, laguntza handiago, parte-hartze handiago eta gizarte-berrikuntza handiago, eta uste dut ez zaigula gaizki joan".

Horregatik, "gizarte osoari onurak ekarriko dizkioten eta aurrerapen ekonomikoari eta gizarte-kohesioari lagunduko dioten alternatiba solidarioak eta partekatuak eskaintzearen" aldeko apustua berretsi du, ez baitago beste biderik gizarte zuzen baterako eta aurrean ditugun erronka eta trantsizio guztiei aurre egiteko "ez bagara ausartzen pertsonak enpresetan antolatzeko modu berriak esploratzera, erabakiak hartzen parte-hartze handiagoa ematera, lan egiten duten proiektu hori beren proiektua dela sentiaraztera, haien jabetza baino gehiago".

"Horretan ere lanean ari gara", esan du Lehendakariordeak, "enpresa tradizionaletan langileak parte hartzeko eta erakartzeko moduak aztertzen, eta lan-sozietateek oso garatuta daukazue hori, sustraitze, lankidetza, parte-hartze, erresilientzia, berritzeko gaitasun eta etengabeko kualifikazioko balio horiek indartu egingo baitituzte enpresa-ekimenak datozen urteetan". Mendiak onartu du botere publikoei dagokigula "prozesu horiek laguntzea eta horien alde egitea. Egin dugu, egiten dugu eta egingo dugu ".

Lankidetza-espiritua

Era berean, eta duela bi aste Donostian egin zen Gizarte Ekonomiaren Enplegu Azokan egin ondoren, Mendiak berretsi egin du berak zuzentzen duen Sailaren baliabide guztiak lan-sozietateei eskaintzen dizkiela "Osalanen bidez, lan egiten duten langileen osasuna beti bermatzeko, eta Lanbideren bidez, lan bila edo daukatena baino lan hobe baten bila erregistratzen direnei aukera-nitxo hori eskaintzeko, ziurrenik ez baitakite lan-sozietateak irtenbide arrakastatsua izan daitezkeela".

Gainera, lankidetza hori datozen hilabeteetan indartu ahal izango dela uste du, "Lanbide-Enplegu Zerbitzu Publikoaren erreforma integrala eta urtea amaitu baino lehen Legebiltzarrak onartuko duen Enplegu Legea aprobetxatuz". Legeak, amaitu du, "sarean lan egitea eta sari hau merezi izan dutenen espiritu bera partekatzea" ahalbidetuko digu.