Lehendakariordeak Zumarragan udalek Lanbiderekin duten konpromisoa nabarmendu du, enplegurako zailtasun handienak dituztenak erreskatatzeko

• Mendiak adierazi duenez, "esku-hartze zuzenak eta lagun-egiteak Lanbideren etorkizuna markatuko dute"

Lehendakariorde eta Lan eta Enpleguko sailburu Idoia Mendiak gaur Zumarragan azpimarratu du udal-erakundeek enplegurako zailtasun handienak dituzten pertsonak Lanbiderekin batera erreskatatzeko duten konpromisoa, eta azpimarratu du esku-hartze zuzeneko eta laguntzako eredu hori izango dela "Enplegu Zerbitzu Publikoaren etorkizuna markatuko duena".

Mendiak Zumarragan parte hartu du gaur, Mikel Serrano alkatearekin batera, DSBE edo BGDS jasotzen duten eta langabezian urtebete baino gehiago daramaten pertsonak gizarteratzeko eta laneratzeko programa pilotuaren itxieran. Programa hori iaz jarri zen abian, eta Europar Batasuneko aparteko funtsek bultzatu dute, Inklusio eta Gizarte Segurantza Ministerioaren bitartez. Ministerioak "eredu bat diseinatzeko erronka bere gain hartu zuen", pertsona horiek enplegura biltzeko. Ondoren, Lanbidek lekukoa hartu zuen bere prospekzio- eta laguntza-lanarekin, eta hamabost udalen zerbitzura jarri du. Zumarragaren kasu zehatzean, hamar parte-hartzaile izan dira prestakuntza eta kontratazioa jaso dutenak, orientazio eta laguntza pertsonalizatuko jarduerez gain, eta horiei beste 240 gehitu behar zaizkie Euskadiko gainerako lurraldeetan.

Bere hitzaldian, Lehendakariordeak udalen zeregina nabarmendu du, zailtasun handienak dituzten auzokideak aukerarik gabe ez uzteko. Enplegu-zifra historikoetan egon arren, Mendiak ez ditu ahaztu nahi izan Euskadin oraindik langabezian dauden 106.000 pertsona baino gehiago, 52.600 luzaroan. Horregatik, programa hau "ezohiko berreskuratze honetan inor ez uzteko asmoaren beste adierazgarri bat da".

Inklusio-eredua

Alde horretatik, Mendiak ziurtatu du kontua ez dela babes-eredurik onena izatea, baizik eta "inklusio-eredurik onena, non babesa bazterketatik ateratzeko pieza bat izango den". Gaineratu duenez, helburua da "behar duenarengana iristea, baina, batez ere, gero eta jende gutxiago egotea behar duena, gai baikara bizi-proiektu bat beren kabuz osatzeko aukerak eskaintzeko". Bere ustez, proiektu honek "zerikusi handia du pertsonen duintasunarekin eta ahalduntzearekin".

Lehendakariordeak Zumarragan parte hartu duten hamar lagunei jakinarazi nahi izan die "gaur ez dela ezer amaitzen. Hemendik aurrera, Enplegu Zerbitzu Publikoak zuei lagunduko dizue lan-merkatuan bete-betean sartzeko ". Gainera, beren premietara egokitutako profilak eskatzen dituzten enpresei Lanbidera joateko eskatu die. "Eraikuntzaren sektorea horietako bat da, eta jakin behar dute, Lanbideren bidez, behar dutena aurki dezaketela", azpimarratu du.

Gizarteratzeko eta laneratzeko proiektu honekin abian jarritako eredua lan egiteko modu bat da, eta "geratzeko etorri da. Zuzenean esku hartzea eta prozesuan laguntzea izango da Lanbideren etorkizuna markatuko duena, eta horrela aurreikusi dugu datorren hilean onartuko dugun Enplegu Legean", ziurtatu du. Mendiak gogorarazi du etorkizuneko legeak udalen zeregina aitortuko duela, baina "zuen auzokideek eta zuen enpresek behar dutena hobeto planifikatuta eta proiektuak finantzatzeko bermearekin blindatuko du".