qrcode

Gordailuen ordainsaria, ziberiruzurrak, finantza-inklusioa eta pertsona eta familientzako zerbitzuen hobekuntza aztertu ditu Eusko Jaurlaritzak banku-erakundeekin batera

2023-10-09

Ekonomia eta Ogasuneko sailburu Pedro Azpiazu eta Turismo, Merkataritza eta Kontsumoko sailburu Javier Hurtado bildu dira gaur Kutxabank, Laboral Kutxa, Banco Santander, BBVA, Caixabank, Banco Sabadell, Abanca Bankoa, Caja Rural de Navarra eta Bankinter banku-erakundeetako ordezkariekin, lehen harreman bat izateko eta finantza-erakundeekin lankidetzan aritu ahal izateko, Eusko Jaurlaritza kezkatzen eta okupatzen duten gaietan.

Bi sailak lanean ari direnaren ildotik, gordailuen ordainsaria izan da jorratutako lehen puntua. Tasen igoerak etxe eta familientzako kredituaren merkatuan ondorioak dituen egoera batera bultzatu du, baina oraindik ez dira iristen beste segmentu batzuetara, hala nola aurrezkiaren ordainsarira. Eusko Jaurlaritzaren ustez, tasak merkatuan islatuko dira azkenean, baina “uste dugu finantza-erakundeek orain egin behar dutela hori”, Luis de Guindos EBZko lehendakariordeak azaldutako jarrerarekin bat etorriz.

Finantza-erakunde batzuek irailean iragarri dute gordailuak ordaintzen hasiko direla, eta Ekonomia eta Ogasun Sailak uste du bankuek zenbait aukera eskaintzen dituztela, gordailuez gain, familia eta partikularrek aurreztu dezaten, “baina, uste dugu pasiboak ordaindu egin behar direla egungo interes-tasa altuekin bat etorriko diren tasetan”. Hala, Europan gordailuen ordainsariak gora egiten du, baita nazioarteko filialak dituzten banku nazionalen aldetik ere, eta “aldaketa hori Euskadira ere eramatea espero dugu orain”. Izan ere, Europako beste herrialde batzuetan ordainsari zabala ematen da, % 3ko mailekin. EBZren estatistiken arabera, Espainiak eta Euskadik urtebeteko atzerapena izan dute gordailuen ordainsarian.

Jarraian, Hurtado sailburuak Kontsumobide kezkatzen duten gaien berri eman du, kontsumitzaileen eta banku-sektorearen arteko harremanari dagokionez. Izan ere, gai horiek sarritan erreklamazioen xede dira edo kolektibo kalteberei eragiten diete. Gai horietako batzuk honako hauek dira: leihatilan operatzeko dauden trabak, banku-komisioen gehiegizko edo bidegabeko kobrantza, batzuetan kontuak ixteko izaten diren eragozpenak, eskudirua ateratzeko arazoak edo erakunde batzuek oinarrizko ordainketa-kontua eskaintzeko duten errezeloa (EBn bizi diren pertsonentzat, asilo-eskatzaileak izan edo kanporatu ezin direnak izan).

Gai horiei eta beste batzuei dagokienez, Hurtado sailburuak iragarri du 2024rako ikuskapen-kanpaina espezifiko bat egingo dela, baina komunikabideak ezartzeko borondatea agertu du, baita “erakunde juridiko batzuekin lehendik jadanik badagoen” harreman arinago bat ere, edozein arazo ebazteko bideak ireki ahal izateko. Kontsumobideren helburua da kontsumitzaileen eskubideak bermatzea eta defendatzea, eta, horregatik, “beti dugu prestasunik handiena hitz egiteko, bitartekari izateko eta hainbat sektoretako erakundeek kontsumitzaileekin duten harremana hobetzeko”.

Horrekin batera, ziberiruzurrak izan dira bileran jorratutako gai garrantzitsu bat. Bi sailburuek beren burua eskaini dute erakundeei horrelako delituak detektatzen eta zuzentzen laguntzeko. Horrela, Cyberzaintza agentzia berriaren bidez —Segurtasun Sailarekin ere lankidetzan—, beharrezko laguntza guztia eskaini da, Kontsumobidek kontsumitzaileei ematen dien babesaren osagarri.

Azkenik, finantza-inklusioari heldu zaio Euskadin heldu beharreko erronka gisa. Horretarako, 2024aren hasierarako hurrengo deialdia iragarri zaie finantza-erakundeei, landa-eremuetako 70 udalerri ingurutan finantza-zerbitzuak bermatzeko, kutxazainak edo “cash back” bidez (kasu horretan, Nekazaritza Sailburuordetzarekin lankidetzan). Euskadin, Europar Batasuneko politikekin bat eta harekin koordinatuta, landa-garapena landa-eremuen hazkunde- eta biziberritze-prozesutzat hartzen da, eta biztanleriaren bizi-baldintzak hobetzea du helburu, hainbat ardatz nagusiren bidez: ardatz ekonomikoa, soziokulturala, ingurumenekoa, etab. Helburua da benetako finantza-inklusio baten alde lan egitea, hazkundea ahalbidetuko duena landa-eremuen garapen ekonomikoan. Izan ere, banku-zerbitzuak ematen dituzten erakundeen presentziak aurrezkia, familien inbertsioa eta enpresa-proiektuen garapena sustatzen du, eta horrek, aldi berean, eremu osoaren aurrerapen ekonomikoari laguntzen dio.

Sailburuekin batera, honako hauek izan dira bileran: Finantza eta Aurrekontuetako sailburuorde Hernando Lacalle, Kabinete eta Koordinazioko buru Yurdana Burgoa, Finantza Politikako zuzendari Arantza Larrauri eta Kontsumobideko zuzendari Laura Alzola.

 

Oraindik ez dago iruzkinik
Iruzkinak itxita daude dokumentu honetan
Ekitaldiko kargudunak