qrcode

 Nerea Melgosa: “Familiaren demokratizazioak berdintasuna, elkarrekiko errespetua, autonomia eta erabakiak hartzea esan nahi du”

2023-09-30
  • Sailburuak Hirukide-Kide Ugariko Familien Elkartearen X. Kongresuaren irekiera-ekitaldian parte hartu du, Euskalduna Jauregian
  • “Familia-harremanek zein gizarte-harremanek funtzionatzeko printzipio egokiak”
  • Kide ugariko familien txartela aurki digitalizatuko dela iragarri du
  • Mar Romera, Pedro García Aguado eta Jorge Ortíz de Urtaranen hitzaldiak

 

Bilbo, 2023 09 30

Berdintasun, Justizia eta Gizarte Politiketako sailburu Nerea Melgosak honako hau adierazi du gaur goizean: "familiaren demokratizazioak berdintasuna, elkarrekiko errespetua, autonomia, elkarrizketan eta kontrastean oinarrituta erabakiak hartzea eta indarkeriarik eza esan nahi du: familia-harremanek zein gizarte-harremanek funtzionatzeko printzipio egokiak”.

 

Melgosa sailburuak Euskalduna Jauregian egin den Hirukide-Euskadiko Kide Ugariko Familien Elkartearen hamargarren kongresuaren irekiera-ekitaldian parte hartu du, Iñigo Abreu, Juan Ibarretxe eta Teresa Laespadarekin batera. Jardunaldiaren barruan, Mar Romera, Pedro García Aguado eta Jorge Ortíz de Urtaranen hitzaldiak eta helduentzako eta haurrentzako saioak (Hirugazteak) izan dira, jokoak eta atrakzioak eskaini dituen zaintza-zerbitzuarekin. Gainera, aukera ugariko familia-plan bat eskaini da, itsasadarrean itsasontziz paseatzeko eta Athletic taldearen zelaia eta museoa eta Itsasmuseuma bisitatzeko aukerarekin.

“Botere publikoei familia hobetzeko prozesu hori gauzatzeko eta prozesu horri indarra eta sendotasuna emateko ahal den guztia egitea dagokigu. Zorionez, euskal familiak parte diren gizartea bera bezain pluralak dira. Dagoeneko ez dago eredu bakar bat, eta guztiak errespetagarriak badira ere, denek ez dituzte premia berak eta arazo berak”, adierazi du Nerea Melgosak.

 

Sailburuaren ustez, “hemen gaudenok bat gatoz seme-alaben babesa eta zaintza familia-politikak bideratzeko funtsezko haria direla diogunean. Hori dela eta, erakunde publikoetan ahalegin berezia egin behar dugu seme-alabak dituzten familiak babesteko”.

 

Giza esentzia

Nerea Melgosak zehaztu duenez, “teknologiak eta adimen artifizialak gure bizitzaren zati handi bat betetzen duten garai honetan, giza esentzia, familia-loturak eta, batez ere, hezkuntza emozionala aldarrikatu behar dira. Adimen emozionalean espezialista den Mar Romera kongresu honetan egoteak gogorarazten digu zein garrantzitsua den balioetan oinarrituta heztea eta gure bizitzan kalitate emozionala lehenestea”.

 

 “Gizarte-ongizatea familia-ongizate emozionalarekin hertsiki lotuta dago. Neurrigabekeria eta mendekotasuna (bideojokoetan, sare sozialetan edo beste edozein esparrutan) ausardiarekin eta erabakitasunarekin aurre egin beharreko erronkak dira”, gaineratu du.

 

Nerea Melgosak Anthony Giddens soziologo britainiarra aipatu du. Hark adierazi zuenez, “familiari buruzko istorio bakarra dago kontatzeko gaur egun, eta demokraziarena da”. “Esan zuen demokrazia publikoko prozesuen jarraibideen arabera demokratizatzen dela familia. Ildo horretan, demokratizazioak berdintasuna, elkarrekiko errespetua, autonomia, elkarrizketan eta kontrastean oinarrituta erabakiak hartzea eta indarkeriarik eza esan nahi duela adierazi zuen. Familia-harremanek zein gizarte-harremanek funtzionatzeko printzipio egokiak”, azpimarratu du sailburuak.

“Familia gizarte zibilaren oinarrizko instituzio bat bada, familia demokratizatua ideal bat dela esan daiteke. Erakunde publikoetan ahalegin berezia egin behar dugu seme-alabak dituzten familiak babesteko. Eusko Jaurlaritzak ekimen aitzindari bat jarri zuen abian joan den martxoan, eta atzeraeraginez urtarrilaren 1etik: hileko 200 euroko laguntza bizitzako lehen 1.000 egunetan. Etapa hori funtsezkoa da adingabeen garapenean. Eta hileko 100 euroko laguntza 3-7 urteko adinean, hirugarren eta ondorengo seme-alaben kasuan; beraz, nabarmen hobetu da lehendik zeuden laguntza ekonomikoen zenbatekoa, eta eskaeren izapideak sinplifikatu egin dira", gogorarazi du sailburuak.

 

Teknologia

Melgosak azpimarratu duenez, "garaiak aldatzen ari dira eta gero eta tresna teknologiko gehiago ditugu. Aurrera egin behar dugu, eta, horretarako, hainbat baliabide izapidetu eta lortzeko aukera erraztu behar dugu. Adibidez, kide ugariko familiaren txartelaren digitalizazioa bi astetan jarriko dugu abian, familientzako baliabideen gida eskainiko dugu (pdf bertsioaren zirriborroa dugu) eta online baliabideak bilatzeko tresna aurrekontuetan sartu dugu".

 

 “Era berean, administrazio publikoetan modu koordinatuan lan egin behar dugu, lan-denboraren berrantolaketan kultura-aldaketa bat ahalbidetu eta sendotu behar dugu, eta familia eta lana uztartzeko eta Euskadi bidezkoago, solidarioago eta berdintasunezkoago bat eraikitzen jarraitzeko aukera ahalbidetu behar dugu”, amaitu du Nerea Melgosak.

 

2 iruzkin
  • Argazkia Xaver
    2023-10-01

    Ondo dago ideia hori, hau da, kode zibila aldatu ahal izatea familia motaren errealitate berriei erantzuteko, familia behartsuenaren mesederako konpromisoak hartuz gero. Ideia hori desberdintasuna ekiditeko da familia tradizionalak eratzearen aldean.

  • Argazkia Xaver
    2023-10-01

    Está bien esa idea de poder cambiar el código civil para atender nuevas realidades de tipo de familia con asunción de compromisos en beneficio de la familia más necesitada supone una desigualdad posible frente a la constitución de familias tradicionales.

Iruzkinak itxita daude dokumentu honetan
Ekitaldiko kargudunak
Beste gonbidatu batzuk
  • Ignacio Mª De Guinea Llop Alberto Cobo Urkiola Iñigo Abreu De Con Gabriel Gutiérrez Goiria Belén Díaz de Sarralde Giménez de Aberasturi María Gorostidi Pagola