Hauteskundeak 2024
qrcode

Donostian inauguratu dute Meet Basque Country, Euskadiko nazioarteko 60 agente turistiko biltzen dituena

2023-10-03

Turoperadoreak Euskadin izango dira aste osoan, Eusko Jaurlaritzako Turismo Sailaren eskutik, euskal turismo-enpresekin helmugaren merkaturatzeari buruzko akordioak ixteko


Gaur, nazioarteko 60 agente turistiko baino gehiago iritsi dira Euskadira, Turismo, Merkataritza eta Kontsumo Sailak antolatutako bidaia batean, Basquetour Turismoaren Euskal Agentziaren bitartez. Lehenengo geldialdia Donostian egin dute, eta bertan igaro dute gaua. Hainbat jarduera eta ibilbide egin ahal izan dituzte, beren interes espezifikoekin bat etorriz. Donostian harrera egin diete Javier Hurtado Turismo, Merkataritza eta Kontsumo sailburuak, Azahara Dominguez Gipuzkoako Mugikortasun, Turismo eta Lurralde Antolamenduko diputatuak eta Eneko Goia Donostiako alkateak.


Sailburuak ongietorria eman die Euskadira, "aste honetan gozatzeko aukera izango duzuen eskaintza askotarikoa" ezaugarri duen lurraldera. Gainera, sailburuak turismoaren garrantzia nabarmendu nahi izan du, motor ekonomiko eta bultzada eraldatzaile gisa, "Donostiak asko baitaki horri buruz, eta Euskadiko gainerako lekuetara ere hedatzen baita". Gaurko harreran, Donostiako Aquariumean, bertaratutakoek Euskadi helmuga aurkezteko bideoak ere ikusi ahal izan dituzte, baita haien arteko lehen topaketak mantendu ere.


Nazioarteko eragileen bisita Turismo, Merkataritza eta Kontsumo Saila turismoa erakartzeko egiten ari den ekintzen barruan kokatzen da, batez ere distantzia luzeko turismoa. Abuztuko kanpinen eta aterpetxeen datuak ezagutu ondoren, Javier Hurtado sailburuak turismoaren udako emaitza positiboak eta "bailara" deituriko aldietako hazkunde desestazionalizatua aztertu ditu; izan ere, urtarriletik ekainera % 15 hazi gara, eta uztailean eta abuztuan % 0,4 bakarrik. Gainera, urteko lehen 8 hilabeteetan nazioarteko turismoak izan duen hazkundea azpimarratu du. "Albiste onak dira, pandemiak gehien erasandakoa izan zelako eta gure sustapen-ahaleginak horretan oinarritu ditugulako; izan ere, desestazionalizazioari, egonaldiaren gorakadari (orain 4,4 egun) eta gastuari nabarmen laguntzen die. Urtarriletik abuztura, nazioarteko turismoa % 16 hazi da, eta naziokoa, berriz, % 4,1. Azken hilabeteetan (maiatza, ekaina, uztaila eta abuztua) nazioarteko turismoa naziokoa baino gehiago izan da sarreretan ".


Meet Basque Country


Eragileek hainbat jarduera egingo dituzte eta bilerak egingo dituzte urriaren 3an eta 6an, bi helburu nagusitatik abiatuta.
Lehenik eta behin, nazioarteko eragileak, batez ere turoperadoreak, euskal turismo-enpresa eta -eragileekin harremanetan jartzea, Euskadi helmuga merkaturatzeko lankidetzak eta akordioak sor daitezen. Horretarako, hainbat bilera eta workshop bat egin ahal izango dituzte Euskadiko agentzia eta enpresa turistikoekin harremanetan jartzeko.


Bigarrenik, astean zehar, turismo-eragileek hainbat "fam trips" egingo dituzte, hau da, espezializatuta dauden gaiarekin lotutako jarduerak eta bisitak egingo dituzte, Euskadi helmuga merkaturatzen hasteko. Gai horien artean daude Euskadirentzat lehentasuna duten turismo-produktuetako batzuk, hala nola gastronomia, zikloturismoa, natura-turismoa edo MICE negozio-turismoa.
Euskadira joango diren turoperadoreak 17 herrialdetatik etorriko dira: Espainia, Erresuma Batua, Alemania, Portugal, Belgika, Herbehereak, Danimarka, Irlanda, Italia, Finlandia, Suedia, Polonia, Maroko, Japonia, Argentina, Brasil eta AEB. Gaur Donostian egingo den topaketaren ondoren, hilaren 4an agenteak Gasteizera joango dira, eta bertan tradizioak izango dira gai nagusia, fokua jarrita.

Oraindik ez dago iruzkinik
Iruzkinak itxita daude dokumentu honetan
Komunikabideek behera kargatzeko
Ekitaldiko kargudunak