Tabako Kerik Gabeko Euskadi
qrcode

Nerea Melgosak agerian utzi du teknologiak eta notariotzat zer-nolako garrantzia duten ezgaitasunak dituzten pertsonak justiziara iristeko

2023-07-19
  • Nerea Melgosa Berdintasun, Justizia eta Gizarte Politiketako sailburuak EHUko ‘Pertsona, Enpresa eta Teknologia’ udako ikastaroa inauguratu du
  • Azarotik aurrera, zenbait egintza edo negozio juridiko bideokonferentzia bidez eman eta baimendu ahal izango dira, notariotza batean fisikoki agertu beharrik gabe
  • “Ezgaitasuna duten pertsonek eskubidea dute justizia-administrazioan gainerakoen baldintza beretan parte hartzeko”, esan du Melgosak

Nerea Melgosa Eusko Jaurlaritzako Berdintasun, Justizia eta Gizarte Politikako sailburuak gaur goizean inauguratu du Pertsona, Enpresa eta Teknologia ikastaroa, UPV/EHUko Udako Ikastaroak Fundazioak eta Notariotzaren Kontseilu Nagusiak antolatua. Bere hitzaldian, Melgosak nabarmendu du notariotzak esparru juridikoan duen funtsezko zeregina, “pertsonen borondatearen autonomia eta oinarrizko eskubideak bermatuz”.

Melgosak 8/2021 Legearen erreformaren garrantzia azpimarratu du, ezgaitasuna duten pertsonei beren gaitasun juridikoa erabiltzen laguntzeko. “Ezgaitasuna duten pertsonen tratamenduari beste ikuspegi bat ematen dio, gaitasun juridikoa baldintza berdinetan onartzen baitu eta erabakiak hartzen laguntzen baitu”.

“Oso aldaketa handia da profesionalentzat, pertsonentzat eta haien familientzat. Prestakuntza eta pentsamolde soziala ere behar dira”, adierazi du Melgosak.

11/2023 Legeak sartutako berrikuntza teknologikoak ere landuko dira ikastaroan, notario-digitalizazioari dagokionez, hala nola sozietateak eratzeko eskritura publikoak on line egitea edo dokumentu publikoen zirkulazio elektronikoa.

Arlo honetan, azarotik aurrera, zenbait egintza edo negozio juridiko bideokonferentzia bidez eman eta baimendu ahal izango dira, notarioaren aurrean agertu beharrik gabe. Sailburuaren hitzetan, “mundu juridikoa gero eta teknologikoagoa den gizarte batera egokitzeko urrats erraldoia da”.

“Baimena urrutitik emateak ez du gutxituko notario-funtzioak dakartzan kontroletako bat ere. Hori guztia kostuak murriztuta, segurtasunik galdu gabe”, zehaztu du sailburuak. “Justizia-administrazioaren esparruan, espediente judizial elektronikoa dagoeneko ezarrita dago alderdi judizial guztietan eta Euskadiko jurisdikzio-ordena guztietan”.

Bere hitzaldian, sailburuak nabarmendu ditu ezgaitasunaren erreformaren ondorioz sortutako arazo berriak. “Jardunaldi hauetan erreforma horren ondorio praktikoak aztertuko dira, bai eta erreforma horren eraginkortasuna bermatzeko hartu diren edo hartu behar diren neurriak ere”, esan du.

Euskadiko 2022-2028 Justiziako Plan Estrategikoko ekintza-lerroetako bat da ezgaitasuna duten pertsonak berdintasunean justiziara sartzea. Alde horretatik, Melgosak azpimarratu duenez, “digitalizazioak bateragarria izan behar du zerbitzu juridiko eskuragarriagoak, atseginagoak eta jendearengandik hurbilagoak egitearekin, bereziki ahulenak kontuan hartuta”.

Sailburuak zehaztu duenez, “aurten, ezgaitasuna duten pertsonei justizia eskuratzeko plan bat prestatzen aritu gara, justiziaren esparru guztietako ordezkariekin, instituzioekin, elkarteekin eta ezgaitasuna duten pertsonen federazioekin”. “Ekainean egin zen azken kontraste-saioa, eta datozen hilabeteetan jendaurrean aurkeztuko ditugu ekintza-plana eta justiziaren eta desgaitasunaren euskal foroa”, esan du.

Nerea Melgosak egindako lanari balioa eman dio, “ez bakarrik jardunaldi hauekin, baita Aequitas fundazioak CERMI fundazioarekin eta ONCE fundazioarekin berriki egin duen aliantzarekin edo notario-dokumentuak irakurketa errazean aurkeztearekin ere”.

2 iruzkin
  • Argazkia Xaver
    2023-07-19

    También a estas personas apoyo formativo cuando la solución esté en la Red, a aprender manejo de la Red dentro de las posibilidades a veces puedan manifestarse en muy pocas ocasiones.

  • Argazkia Xaver
    2023-07-19

    Pertsona horiei ere prestakuntza-laguntza ematen zaie, konponbidea Sarean dagoenean, Sarea erabiltzen ikasteko, aukeren barruan, eta batzuetan oso gutxitan ager daitezke.

Iruzkinak itxita daude dokumentu honetan
Ekitaldiko kargudunak