Berriak Hezkuntza
qrcode

Hezkuntza Sailak 2,2 milioi euro bideratu ditu lanbide heziketako itunpeko ikastetxeetan makinak eta ekimipamendua eskuratu edo errentan hartzeko (Gobernu Bilera 2023-5-16)

2023-05-16

Gobernu Kontseiluak gaurko bileran onartu du, Hezkuntza sailburuak proposatuta, Lanbide Heziketako arloan dirulaguntzak deitzen dituen Agindu bat. Honen bidez, Lanbide Heziketako heziketa-zikloak ematen dituzten itunpeko ikastetxeek makinak edota ekipamendua erosi edo errentan har ditzaten dirulaguntzak ematen ditu Hezkuntza Sailak.

2.217.487 euroko diru-kopurua duen deialdi honen xedea da dirulaguntzak ematea, makineria edota ekipamendua erosteko edo errentan hartzeko kuotak finantzatzeko, bai eta makina edo ekipamendu horrek eragindako instalazio-gastuak finantzatzeko ere. Deaialdi honek bi lerro bereizten ditu, jarduera-eremuaren arabera:

  • 1 eremua: modalitate presentzial osoan ezarritako Lanbide Heziketako zikloak ematen dituzten itunpeko ikastetxeei zuzendua, heziketa-zikloak emateko beharrezkoak diren makinak eta/edo ekipamendua eguneratzeko. Eremu honek milioi bat euroko kopurua du.
  • 2 eremua: modalitate presentzial osoan ezarritako Lanbide Heziketako zikloak ematen dituzten ikastetxe integratu itunduei zuzendua, 4.0 eta 5.0 inguruneen erronkei erantzungo dieten eta eraldaketa digitalerako eta Lanbide Heziketaren jasangarritasunerako planak ezarriko dituzten proiektuei ekiteko. Eremu honek 1.217.487 euroko finantzazioa du.

Ikastetxeetatik jasoriko finantzazio eskaeren balorazioa egiteko, lehen eremuan, batzordeak kontuan hartuko dituen irizpideak honakoak dira, besteak beste: eskaera egiten duen ikastetxeak eskaintzen duen ziklo kopurua; ziklo horietan matrikulaturiko ikasle kopurua; erronketan oinarritutako ETHAZI ikaskuntza-metodologiak ikastetxean duen ezarpen-maila; edo ikastetxearen parte hartzea Hezkuntza Sailak bultzatutako ekintzailetza-programetan.

Bigarren esparrurako, berriz, honako irizpide hauek hartuko dira kontuan balorazioa egiteko: eskuratutako ekipamenduaren egokitasuna, 4.0 eta 5.0 inguruneko berezko teknologiak inplementatzeko (errealitate areagotua edo birtuala, elkarlaneko robotika, fabrikazio gehigarria, Internet industriala, sistema ziber-fisikoak, zibersegurtasuna, biki digitala…); ekipamendu horrek ikastetxean izango duen irismena; inbertsioak ikasleen eta irakasleen artean izango duen eragina; diruz lagundutako makineriak ikastetxean abiatutako proiektuekin duen lotura; edo teknologia hauetan irakasleak prestatzeko planak.

Eguneratzea, ezinbestekoa

Gaur egun, adimen artifiziala, robotika, droneak, 3D inprimagailuak, gauzen Internet, errealitate birtuala, sare digitalak eta gisa horretako berrikuntzak ondasunen eta zerbitzuen ohiko trukea erabat aldatzen ari diren fenomenoak dira. Horiek guztiek, erronka handiak dakartzate enpresa-sektoreetara eta pertsonen prestakuntzara.

Testuinguru horretan, Lanbide Heziketa ezinbesteko bidelaguna da gaur egun Euskadin, bai pertsonen enplegagarritasunerako, bai enpresen lehiakortasunerako. Erronka horiek Lanbide Heziketako ikastetxeen parte-hartze aktiboa eskatzen dute, 4.0 gizarte baten benetako beharretara egokitutako prestakuntza bultzatu eta garatzeko beharrezkoak diren aldaketak egin behar baitituzte.  Zeregin honetan, ekipamendu eguneratua eta espezifikoa izatea ezinbestekoa zaie Lanbide Heziketako ikastetxeei.

Deialdi honen bidez eta joan den ikasturtean, Lanbide Heziketako itunpeko 53 ikastetxek jaso zituzten laguntza ekonomiko horiek lehen eremuaren baitan, eta 8 ikastetxek 2. eremuaren baitan.

Iruzkin bat
  • Argazkia SN Robot
    @TuArrendamiento
    2023-05-16

    Comentario de Twitter:
    Educación destina 2,2 millones de euros para la adquisición o arrendamiento de ... - Irekia https://t.co/cE8RNTKATV

Iruzkinak itxita daude dokumentu honetan
Komunikabideek behera kargatzeko