Euskadi garapen- eta erresilientzia-ereduaren erreferentea OECDren goi-bileran

• Arantxa Tapia sailburua eta Mari Jose Aranguren ORKESTRAko zuzendaria OECDko Enpleguaren eta Tokiko Garapen Ekonomikoaren Zuzendaritza Batzordearen bileran izango dira, bihar, Trenton

Arantxa Tapia Ekonomiaren Garapen, Jasangarritasun eta Ingurumeneko sailburuak OECDren (Organization for Economic Co-operation and Development) Enpleguaren eta Tokiko Garapen Ekonomikoaren Zuzendaritza Batzordearen (LEED) 82. saioan parte hartuko du bihar, Trenton (Italia). Antolatzaileek Euskal Herriko kasua aurkezteko gonbidapena egin diote sailburuari, maiatzaren 10ean 10:15etik 11:00etara egingo den "Tokiko garapenaren aldaketa-komunitateak eta -historiak berritzea" gaiari buruzko mahai inguruan.

Bere hitzaldian saiburuak Euskadiren garapenaren azken hamarkadetako historia kontatuko du, Euskadiren etorkizunaren ikuspegiari, tokiko garapenari eta erresilientziari buruzko eredu gisa. Toki-garapenerako beti aldatzen ari den panoraman, erakundeak “interes handikotzat” jo du Euskadiren historia hurbilean lagundu duten lehentasun politikoak ezagutzea, eta, aldi berean, “etorkizuneko erronka, trantsizio eta talketarako erresilientzia-gaitasuna eman dutenak”.

OECDren LEED Programa 1982an sortu zen, erakundeko gobernuak enpleguaren krisiari irtenbideak ematen saiatzen ari zirenean eta tokiko enplegua sortzeko, gizarteratzeko eta hazkunde ekonomikorako ikuspegi berritzaileak partekatuko zituen nazioarteko erakunde bat sortzeko beharra ikusi zutenean. Programaren hurrengo Zuzendaritza Batzordea Trenton izango da, OECDren Toki Garapenerako LEED Trento Zentroaren 20. urteurrenaren barruan.

Euskadik hainbat lotura ditu OECDren LEED programarekin eta Trentorekin. Adibidez, Orkestra Trentoko Zentroko Produktibitate Espazialeko Laborategiko bazkide ofiziala da. Hori dela eta, sailburuak Mari Jose Arangurekin batera parte hartuko du topaketan. Orkestrako zuzendari nagusia eta Deustuko Unibertsitateko Ekonomia katedraduna da Aranguren.

Topaketak Europako hainbat herrialdetako agintariekin aldebiko bilerak egiteko ere balioko du.

Ekonomia Lankidetza eta Garapenerako Erakundea, OECD

Ekonomia Lankidetza eta Garapenerako Erakundea bizitza hobe baterako politika eraginkorragoak eraikitzeko lan egiten duen nazioarteko erakundea da. Helburua oparotasuna, berdintasuna, aukerak eta ongizatea sustatzen dituzten politikak lantzea da, eta 60 urteko esperientzia eta ezagutza dute, eta horren inguruan lan egiten dute biharko mundua hobeto prestatzeko.

Gobernuekin, arduradun politikoekin eta herritarrekin batera, OECE lanean ari da emaitzetan oinarritutako nazioarteko arauak ezartzeko eta gizarte-, ekonomia- eta ingurumen-erronka batzuei irtenbideak aurkitzeko. Emaitza ekonomikoak hobetzetik eta enplegua sortzera, hezkuntza sendoa sustatzera eta nazioarteko zerga-ihesaren aurka borrokatzera, foro bakarra eta ezagutza-zentro bat eskaintzen ditu, datuak aztertzeko, esperientziak trukatzeko, jardunbide egokiak bateratzeko, politika publikoei buruzko aholkularitza emateko eta nazioarteko arauak ezartzeko.