Lehendakariak nabarmendu egin du euskal industria-sarearen indarra, dibertsifikazioan eta nazioartekotzean oinarritutakoa

• Iñigo Urkulluk amaiera eman dio AFM – Fabrikazio Aurreratuaren eta Digitalaren Eguna Batzar Nagusiari, eta Euskadiren egoera ekonomikoa positiboa dela adierazi du bertan
• Gogorarazi du euskal esportazioak % 57 hazi direla azken hamarkadan, “gure Herrian fabrikatzen dugunak munduan interesa duenaren erakusgarri”

Lehendakariak nabarmendu egin du euskal industria-sarearen indarra, dibertsifikazioan eta nazioartekotzean oinarritutakoa. Fabrikazio Aurreratuaren eta Digitalaren Egunaren amaieran, Iñigo Urkulluk adierazi du “etorkizun arrakastatsua bermatzen digun” gakoa dela industria dibertsifikatua izatea, bezero potentzialen eskaerari aurrea hartu eta erantzungo diona.

AFM Cluster makina-erremintaren fabrikatzaileen elkarteak antolatutako foro honetan, lehendakariak azpimarratu du sektore honek duen gainditze-ahalmena —baita testuinguru zailetan ere—, eta hobetzeko eta hazteko “lehia-irrika horri” eustera animatu ditu. “Iraunkortasunaren, erresistentziaren eta gainditzearen” adibide bat zarete —esan du—.

Ildo beretik, aste honetan bertan ezagututako fabrikazio-teknologia aurreratuen eta makina-erreminten sektoreko datuak aipatu ditu. Datu horiek aditzera ematen dute esportazioen % 4 inguruko hazkundea urte-itxieran.

Maila orokorrago batean, lehendakariak esan du egoera ekonomikoa positiboa dela eta Euskadik inoiz baino gehiago esportatzen duela. Hala, gogorarazi du euskal esportazioak % 57 hazi direla azken 10 urteotan, “gure Herrian fabrikatzen dugunak munduan interesa duenaren erakusgarri”. Esan duenez, “lehiakorrak gara merkatu globalizatu eta izugarri zorrotz honetan”.

Azkenik, Iñigo Urkulluk bi helburu nabarmendu ditu, bere ustez azken hamarkada honetan bidelagun izan ditugunak: industria eta zerbitzu aurreratuak bultzatzea eta enplegu-aukerak sortzen laguntzea. Lehenengoan, Euskadik aurrera egin du eta % 40 gainditzen du; bigarrenean, berriz, Euskadi lan egiten eta kotizatzen duten ia milioi bat lagun izatera hurbiltzen da, gogorarazi duenez.

 “Industria eta Enplegua… Makina-erreminta funtsezko pieza bat da herrialde-mailako helburu horiek lortzeko. Gure lanaren kulturaren parte da; besterik gabe, ondo ateratzen zaigun zerbait da” —esan du amaitzeko—.