Berriak Berdintasuna, Justizia eta Gizarte Politikak
qrcode

Euskal espetxeetako plantilla indartu egin da lan-poltsatik etorritako lehen 48 pertsonak lanean sartuz

2023-01-18
  • C1 espetxeko laguntzailearen mailarekin, 21 pertsona hasiko dira gaurtik aurrera Gipuzkoako espetxean lanean; beste 22 pertsona bihar hasiko dira Arabako espetxean, eta beste 5 ostiralean sartuko dira Bizkaiko espetxean
  • Sarrera probak 55 lagunek gainditu dituzte; horietatik hiru destinoaren zain daude eta beste lauk plazari uko egitea erabaki dute
  • Laster, ikastaro berrirako deialdia egingo da 45 lagun gehiagorentzat, eta oraingo taldeari gehituko zaizkio

 

Vitoria-Gasteiz, 2023/01/18

Aste honetatik aurrera, EAEko espetxeetako taldean 48 pertsona sartuko dira aldi baterako lan-poltsatik, eta C1 espetxeko laguntzaile lanpostu bat beteko dute.

Lehen laneratzeak gaur bertan egingo dira, Gipuzkoako espetxean 21 pertsona sartzen direnean; hurrengo egunean, 22 izango dira Arabako espetxean hasiko direnak, eta ostiralean, berriz, 5 izango dira Bizkaiko espetxeko ohiko plantilla sendotuko dutenak. Guztiek tutore baten laguntza izango dute, bertako lanpostuetan integratzeko.

Bestalde, Justizia Administrazioko Zuzendaritzak jakinarazi duenez, beste hiru pertsona beren destinoaren zain daude. Hori hurrengo egunetan ebatziko da.

Euskal espetxeetarako lehen lan-poltsako hautaketa-probetan 60 pertsonak hartu zuten parte, bere garaian iragarri bezala. Hala ere, prestakuntza teorikoa eta praktika-prozesua amaitu ondoren, bost pertsona prozesutik kanpo geratu ziren, eta beste 55ek, berriz, poltsa horretan sartzeko oniritzia jaso zuten. Azken horietatik hiruk beste lanpostu batzuk onartzea erabaki zuten, eta laugarrenak lan-eskaintzari uko egin zion.

Lehen espetxe-poltsa horretan 51 laguntzaile daude, gehienak emakumeak, 34 urteko batez besteko adinarekin eta deialdian eskatutakoa baino prestakuntza handiagokoarekin. Zehazki, Araban 17 emakume eta 5 gizon sartuko dira lanean; Gipuzkoan, 14 emakume eta 7 gizon, eta Bizkaian, 5 emakume.

Hala eta guztiz ere, Justizia Administrazioko Zuzendaritzak jakinarazi du laster beste ikastaro bat hasiko dela, beste 45 pertsonak parte hartuko dutela, eta dagoeneko aurkeztu dutela hautagaitza hasierako hautaketa-prozesuan. Talde honek besteen prestakuntza/praktika bera jasoko du. Oraingoz, izapideak hasi dira eta bigarren deialdi honetarako behar diren baimenak lortzen ari dira.

Lan-taldea indartzea izan da Berdintasun, Justizia eta Gizarte Politika Sailaren lehentasunezko helburuetako bat, Eusko Jaurlaritzak duela urtebete baino gehiago hiru euskal espetxeen kudeaketa bere gain hartu zuenetik.

Funtzionarioen kopurua handitzeko, beharrezkoa da Eusko Jaurlaritzak lanean jarraitzen duen lege-izapide batzuk betetzea. Horrela, lehenik eta behin, funtzionario talde berri honen lanpostuak eta eskalak zehaztu behar dira, ondoren dagokion lanpostuen zerrenda egiteko eta, azkenik, oposiziorako deia egiteko.

Ezarritako prozesua aurrera doan bitartean, Beatriz Artolazabalen Sailak akordio bat sinatu zuen bere garaian espetxe-arloko sindikatu nagusiarekin, Acaip-UGTrekin, gaur lehenengo errefortzuak sartuta aktibatzen den lan-poltsa bat deitzeko.

Oraindik ez dago iruzkinik
Iruzkinak itxita daude dokumentu honetan
Ekitaldiko kargudunak
(XII legealdia 2020 - 2024)