Hauteskundeak 2024
qrcode

Indarkeria matxistaren eremuan arreta hobetzeko III. Akordioa urtarrilaren 19an sinatuko da Lehendakaria buru dela (Gobernu Bilera 2023-01-10)

2023-01-10
  • Artolazabal sailburuak gaur aurkeztu dio Gobernu Kontseiluari biktima diren emakumeei arreta integralagoa eta pertsonalizatuagoa emateko aurrerapauso nabarmena izango den akordioa
  • Arau-testuinguru berriak eta protagonismoa hartzen ari diren indarkeria-mota berriek justifikatzen dute hura berritzea, haren esanetan 

Beatriz Artolazabal, Berdintasun, Justizia eta Gizarte Politiketarako Sailburuak gaur aurkeztu dio Gobernu Kontseiluari Indarkeria matxistaren biktima diren emakumeen arreta hobetzeko III. Akordioa. Akordio hau abenduaren 20an onartu zuen akordioaren jarraipen batzordeak Emakunden egin zuen bileran eta datorren urtarrilaren 19an egingo dute erakundeek honen sinadura ofiziala, Iñigo Urkullu buru izanda, Lehendakaritzan egingo den ekitaldian.

Akordioa 2001ean sinatu zen lehen aldiz, eta 2009an eguneratu zen eta honen helburua da tratu txarren eta sexu-erasoen biktimen arretan inplikatuta dauden erakundeen arteko koordinazioa, haiei babes osoa bermatzeko sanitario, polizial, judizial eta soziala.

Artolazabalek, aurreko bi akordioek ekarri dituzten aurrerapenei balioa eman ondoren, hirugarren akordio baten beharra defendatu du “azken hamarkadetan izan diren arau eta gizarte aldaketengatik”. Adierazi duzun bezala, “garrantzi handiko lege-aldaketak egin dira, : Istanbulgo Hitzarmena, haurrak eta nerabeak babesteko Legea, genero-indarkeriaren aurkako Estatu Ituna, sexu-askatasuna bermatzeko Legea, emakumeen eta gizonen berdintasunerako Legea…, eta, ondorioz, beharrezkoa da akordioaren edukiak eguneratzea eta protokoloak eta koordinaziorako bestelako tresnak berrikustea”. Era berean, esan duenez, “aldaketa sozialak gertatu dira, eta, horien ondorioz, indarkeria-mota batzuek protagonismo handiagoa hartu dute, eta emakumeen aurkako indarkeria matxista mota berriak sortu dira, hala nola, Internet, sare sozial, gailu mugikorren bitartez edo, adibidez, ikusgarritasun handiagoa lortu duten indarkeria mota batzuk, hala nola, taldeko erasoak edo mendekotasun kimikoa deitutakoaren erabilera”. Artolazabalen iritziz, aldaketa horiek guztiek, bai arauek bai gizartekoek, akordioa eguneratu beharra dakarte.

Adierazi duenez, hirugarren akordioaren sinadura “urrats garrantzitsua izango da bere helburu nagusietako batean: biktimen beharrak erdigunean jartzea”.  

Besteak beste, aurrerapauso garrantzitsua izango da biktimei arreta integralagoa eta pertsonalizatuagoa emateko eta biktimak birbiktimizatzea saihesteko.

Ekarriko dituen aurrerapenen artean, indarkeria matxista mota guztiak aipatzea dago, adibidez, ez bakarrik bikotekidearen edo bikotekide ohiaren indarkeria, familia barrukoa eta sexu-indarkeria; baita emakumeak, haien seme-alabak eta inguruko beste pertsona batzuk biktima gisa aitortzea ere, arlo horretako arau-testuinguru berriarekin bat etorriz.

Beste aurrerapen bat kasuen detekzio goiztiarrarekin lotuta dago; izan ere, akordioak eremu eta sistema guztietako erakunde guztien proaktibitatea sustatzen du, eta erakunde sinatzaileen konpromisoak zabaltzen ditu emakume biktimei arreta ematen dieten profesionalen prestakuntzari dagokionez.

Akordioak erakundeen arteko koordinazio-lana indartzen du, lurralde historiko bakoitzean koordinazio-talde berriak sortuz eta urtero elkartrukerako eta prestakuntzarako topaketa bat antolatuz, hainbat eremu eta sistematako profesionalentzat. Eta beste hobekuntza bat izango da jarduera koordinatuaren protokoloak, III. Akordio honen bidez, argitasun eta zehaztasun handiagoa eskaintzen duela sistema bakoitzeko operadoreek jarraitu beharreko jarraibideei dagokienez. Edukiak eremu bakoitzeko eragileak eta horien funtzionamendua ezagutzea errazten du.

Era berean, akordioak aukera emango du adituek edo eragindako pertsonen erakunde eta elkarteetako kideek batzordean parte hartzeko, eta hezkuntzaren, etxebizitzaren eta enpleguaren esparruetarako jarraibideak jasoko ditu berariaz.

Emakundek koordinatutako batzordea Eusko Jaurlaritzako sei sailek osatzen dute (Berdintasuna, Justizia eta Gizarte Politikak; Segurtasuna; Osasuna; Lana eta Enplegua; Hezkuntza; eta Lurralde Plangintza, Etxebizitza eta Garraioak), Botere Judizialaren Kontseilu Nagusiak, Euskal Autonomia Erkidegoko Fiskaltza Nagusiak, hiru aldundiek, EUDELek, , Legelarien Euskal Kontseiluak eta Euskal Osasun Kontseiluak; eta, gainera, hainbat lantalde teknikotan hedatzen da hauen jarduna.

Oraindik ez dago iruzkinik
Iruzkinak itxita daude dokumentu honetan
Komunikabideek behera kargatzeko