Berriak Lurralde Plangintza, Etxebizitza eta Garraioak
qrcode

93 milioi euro, 12 udalerriri zuzendutako zuzeneko dirulaguntzetan, 14 auzoren hiri-berroneratzerako (Gobernu Bilera 2022-12-27)

2022-12-27

Gobernu Kontseiluak argi berdea eman die astearte honetan Lurralde Plangintza, Etxebizitza eta Garraio Sailaren zuzeneko dirulaguntzei, 93 milioi euroko laguntzak emateko Euskal Autonomia Erkidegoko 12 udalerritako 14 auzo kalteberen hiri-berroneratzerako. 

Proiektuak Euskal Autonomia Erkidegoko auzo kalteberen hiri-berroneratze integralerako planaren barruan kokatzen dira. Plan horretan, Lurralde Plangintza, Etxebizitza eta Garraio Saila duela sei urtetik ari da lanean, eta laguntzen handitze horrekin, hirugarrena, autonomia-erkidego osoko 21 udalerritara heldu da jada. 

Araban, Gasteizko Zaramaga auzoan egingo da lan; Bizkaian, Bilboko hiru auzotan (Unzeta parrokoa, Urizar dorrea eta Uretamendi), Bermeon (Iparragirre eta Txibitxiaga) eta Sestaon (Vista Alegre); eta Gipuzkoan, Arrasaten (Santa Teresa auzoa), Donostian (Altza), Eibarren (Hijos de Gabilondo), Elgoibarren (Sigma etxebizitzak), Errenterian (Beraun), Leaburun (Txarama), Soraluzen (Ezozia) eta Irunen. 

Finantzaketa Eusko Jaurlaritzak eta hiru foru-aldundiek 2022-2025 aldirako aktibatutako Inbertsio Estrategikoen Erakunde Arteko Planetik (PIIE) dator. 93 milioi euro horietatik 90,73 udalerriei zuzeneko laguntzak emateko erabiliko dira, eta gainerako 2,27ak Finantzen Euskal Institutuari transferituko zaizkio, kalteberatasun-egoeran dauden pertsonek beren eraikinen birgaitzeetan bere gain hartu behar dituzten inbertsioak finantzatzeko abalak sortzeko, behin programarekin bat egitea adosten dutenean.   

Hiri-, ingurumen-, gizarte- eta ekonomia-ikuspegitik berroneratze integralari heltzen dioten proiektuak dira, eraikinen eta etxebizitzen bizigarritasuna eta haien ingurunea hobetuz. Auzoek auzoko bulegoak izango dituzte, Opengela proiektuaren ereduari jarraiki. Bulego horiek eraikinen eta etxebizitzen irisgarritasuna, bizigarritasuna edo energia-efizientzia hobetu nahi duten bizilagunentzako laguntzei buruzko informazioa ematera bideratuta egongo dira. Jarduketen artean, honako hauek daude: autokontsumo energetikoko komunitateak edo berdegune eta ekipamendu berriak sortzea ingurune horretan bizilagunentzat, argiteria publikoa hobetzea, oinezkoentzako guneak bultzatzea, eraikinen isolamenduak hobetzea edo igogailuak jartzea kaleetan, irisgarritasuna errazteko.

Oraindik ez dago iruzkinik
Iruzkinak itxita daude dokumentu honetan
Komunikabideek behera kargatzeko