Hezkuntza Sailak 3,9 milioi euro bideratu ditu unibertsitate eremuan digitalizazio, Unibertsitatea+Hezkuntza eta osasun ikasketetako programak finantzatzeko (Gobernu Bilera 2022-12-07)
Gobernu Kontseiluak gaurko bileran adostu du, Hezkuntza sailburuak proposatuta, zuzeneko dirulaguntza bana ematea UPV/EHUri, Deustuko Unibertsitateari eta Mondragon Unibertsitateari. Laguntza hauek, lehentasunezko hiru eremu hauetako programak eta ekintzak finantzatzera bideratuko dira: eraldaketa digitala unibertsitatean; Unibertsitatea+Hezkuntza proiektuak eta osasun-ikasketetako programak.
Hiru dirulaguntza hauen batura 3.934.121 eurokoa da, eta honela banatzen dira hiru unibertsitateen artean:
- UPV/EHU: 2.920.351 euro
- Deustuko Unibertsitatea: 721.346 euro
- Mondragon Unibertsitatea: 292.424 euro
Hezkuntza Sailak beharrezkotzat jotzen du 2019-2022 Unibertsitate Sistemaren Planetik harago ere ekintza osagarriak sustatzea, baldin eta ekintza horiek garatzeak eragin nabarmena badu euskal gizartearen lehentasunetan, honako hiru jarduera-ildo hauetan:
- Unibertsitateen eraldaketa digitala
- Hezkuntza arloko ikerketa bultzatzea hezkuntza-sisteman, ikerketa aplikatua eta bikaintasunekoa sendotuz, unibertsitate aurreko euskal hezkuntza-sistemarekin lankidetzan arituz, eta unibertsitatearen eta euskal hezkuntza-sistemako lan profesionalaren arteko harremana are gehiago estutuz.
- Osagai birtuala duten eta osasun-zientziekin eta, bereziki, medikuntzarekin eta erizaintzarekin lotutako ikasketetan prestakuntza indartzea, ikuspegi berritzaile batetik.
Digitalizazioa
Laguntza hauen bidez, Hezkuntza Sailaren Eraldaketa Digitalerako Planean jasotako helburuen eta esku-hartze arloen garapena bultzatu nahi da, “Unibertsitate Ekosistema” izeneko atalean: gaikuntza eta plangintza digital integrala bultzatuz; Unibertsitate-Ekosistema azpiegitura eta euskarri digitalez hornituz; eta bikaintasun-ikerketa maximizatzera eta emaitzak zabaltzera bideratutako eraldaketa digitaleko prozesuak indartuz.
Hezkuntza arloko ikerketa
Unibertsitatea+Hezkuntza proiektuen bidez hezkuntza arloko ikerketa bultzatzeari buruzko atal honetan, dirulaguntza hauen bidez honako hau bultzatu nahi da: ikerketa aplikatuko eta lankidetzazko bikaintasuneko proiektuak diseinatu, garatu eta abian jartzea. Hona hemen ikerketa-ildoak:
- Digitalizazioa: metodologia eta gaitasun tekno-pedagogikoak, eta ingurune digitalaren eta ingurune presentzialaren integrazioa
- STEAM proiektuak: ikasleen artean STEAM esparruetako gaitasun zientifiko-teknologikoak barneratzea eta jarrerak bereganatzea
- Kulturartekotasuna eta eskola-arrakasta: metodologiak eta hizkuntza-gaitasunak ingurune inklusiboetan
Osasun ikasketak, ikuspegi berritzailez
Eremu honetan, ospitale birtualak edo ospitale birtual horiei lotutako prestakuntza-proiektu berritzaileak hornitzera edo indartzera bideratzen dira ekintzak. Ospitale birtual horiek kalitatezko irakaskuntza birtuala sustatzen dute, eta eragin handia dute ikasleen etorkizuneko lanbide-jardunean edo osasun-arloko profesionalek unibertsitatean jasotako etengabeko prestakuntzan.
