Irailean langabeziak behera egin izanak eta Gizarte Segurantzako afiliazioak gora egin izanak edukia eman diote Astekonomiari

2022-10-07

Astekonomiako edukiak, neurri handi batean, lan-merkatuaren egoeraren berri ematen du gaur, itxura ona erakusten duten iraileko azken datuekin. Era berean, asteko adierazle ekonomiko garrantzitsuenen laburpen honek abuztuan Euskal Autonomia Erkidegoko industria-produkzioak izandako hobekuntzan jartzen du arreta.

Irailean, Lanbideren bulegoetan erregistratutako langabezia % 6,5 murriztu zen 2021eko hil beraren aldean. Guztira, 111.700 langabe daude enplegu-bulegoetan izena emanda. Horietatik 64.600 emakumeak dira. Hil honetan gazteen artean langabeziak nabarmen egin du behera (-% 15,0).

Bestalde, Gizarte Segurantzako afiliazioa % 1,8 handitu zen irailean aurreko urtearen aldean. Aldakuntza-tasa hori aurreko bi hilabeteetan erregistratutakoaren antzekoa da. Guztira, ia 975.900 afiliazio erregistratu ziren, irailean ezagutu den kopururik handiena.

Bestela, eta Eustatek argitaratutako informazioaren arabera, abuztuan IPI % 5,6 hazi zen urte arteko tasan. Horri esker, 2022ko produkzioa azken hamaika urteetako handiena izango da. Hazkundea oso handia izan zen kontsumo-ondasunetan (% 15,3) eta energia-produkzioan (% 15,8).

Ekonomia Zuzendaritzak "Astekonomia" izenarekin egindako asteko laburpen hau minutu bateko iraupena duten bideo hauen —gaurkotasun ekonomikoaren hedapena eta jarraipena errazteko— oinarria da.  

Oraindik ez dago iruzkinik
Iruzkinak itxita daude dokumentu honetan