Berriak Segurtasuna

Josu Erkoreka: "Euskadi herrialde aski segurua da"

2022-09-14

Lehen Lehendakariorde eta Segurtasuneko Sailburua, Josu Erkorekari elkarrizketa egin diote, gaur goizean, Radio Euskadi-ko “Boulevard” saioan. Bertan, nabarmendu du Euskadi herrialde aski segurua dela, eta delituen ehunekoa Europako batez bestekoaren azpitik dagoela.

Hala ere, Segurtasuneko sailburuak adierazi du bilakaerak erakusten duela kriminalitateak gora egin duela 2019. urtearekin alderatuta; batez ere lesioekin, ondarearen aurkako delituekin edo sexu-askatasunaren aurkako eta sexu-erasoekin lotutako delituei dagokienez, azken kasu horretan % 48ko igoera gertatu da 2019. urtearekin alderatuta. Gainera, bereziki nabarmendu ditu urtetik urtera gora egiten duten delitu informatikoak: iruzurrak, nortasun-ordezkapenak, jazarpenak, mehatxuak…

Udari dagokienez, sailburuak azaldu du kriminalitate-zifrak asko hurbiltzen direla 2019koetara, eta delitu-motak antzekoak direla. “Ez dugu antzeman delitu-datuek okerrera egin dutenik. Urtea jarraitua dela ikusi beharko da”, adierazi du.

Ziztaden gaiari buruz galdetuta, lehendakariorde eta Segurtasuneko sailburuak azaldu du, udako kanpainaren ondoren, balantzea dela ez dagoela atxiloturik ez autoritaterik, eta hori funtsezko osagaia dela delitu bat jazartzeko. Halaber, Erkorekak nabarmendu du ziztaden ondoren ez dela substantzia toxikoen arrastorik aurkitu, eta horrek zaildu egiten duela ikerketa.

Santutxuko lapurretak

Elkarrizketan zehar, Josu Erkorekak Santutxun egiten ari diren lapurretak ere izan ditu hizpide. Sailburuak azaldu duenez, pertsona toxikomano bat da lapurretak egiten dituena, baliabide ekonomikoak behar ditu eta lapurtu egiten du horretarako. “Pertsona hori hainbat aldiz atxilotu dute, baina kalera ateratzen denean lapurtu egiten du berriz”, zehaztu du.

Ezker abertzalea

Landu den beste gaietako bat ezker abertzalearen eta Ertzaintzaren arteko harremanari buruzkoa izan da. Erkorekak adierazi du normala iruditzen zaiola harreman hori normalizatzea. “Ezker abertzalea euskal erakundeak bete-betean gobernatu nahi dituen alderdi politiko gisa aurkezten bada, logikoa denez, iragana gainditu eta erreferente instituzionalak direnak direla onartu behar du, eta erreferente horiekiko harremanak normalizatu, Ertzaintza barne”, esan du.

Oraindik ez dago iruzkinik
Iruzkinak itxita daude dokumentu honetan
Ekitaldiko kargudunak