“Ekintzak” eta ez hitz onak eskatu dizkio Garamendik Espainiako Gobernuari falta diren transferentzien “paralisiari” amaiera emateko

2022-07-29
  • Gobernantza Publiko eta Autogobernu Sailburuak falta diren transferentziei ekiteko eskatu dio Jaurlaritzari
  • “Iruditzen zait argudio juridikoen atzean borondate politikorik eza ezkutatzen dutela”

Olatz Garamendi Gobernantza Publiko eta Autogobernu Sailburua Isabel Rodriguez Lurralde Politikako ministroarekin bildu da gaur Leioako Artaza Jauregian, egiteke dauden transferentzien egoerari buruz hitz egiteko. Garamendik azpimarratu duenez, transferentzia prozesuan dagoen "paralisiaren" aurrean eskatu zuen bilera, "beste jarrera bat erakus dezan eta transferitzeke dauden gaiak berriro aztertu eta bideratu ditzan", Gernikako Estatutuak jasotzen duen bezala.

Sailburuak ministroari gogorarazi dio Eusko Jaurlaritzak iragan urtarrilean proposamen batzuk bidali zituela eskualdatu beharreko gaiei buruz (itsasbazterraren kudeaketa, meteorologia, immigrazioa eta zinematografia babesteko funtsa), eta azpimarratu du "denbora honetan guztian ez dutela inolako erantzunik izan". Honen harira, erantsi du iruditzen zaiola Espainiako Gobernua “argudio juridikoen atzean, gai horiei heltzeko borondate politikorik eza ezkutatzen ari direla ", gaineratu du.

Bilera ordu erdi ingurukoa izan da, eta Sailburuak argitu nahi izan du berak eskatuta egin dela bilera prozesuaren geldialdia dela eta. Garamendik ukatu egin du “protokolozko” bilera izan denik, Rodriguez ministroak hala adierazi badu ere, eta azpimarratu du hitzorduak profil politiko eta instituzional argia izan duela. Sailburuak azaldu duenez, ministroak urrian aldiriko trenen trenbidea itxita uztea proposatu dio, hori baita une honetan negoziatzen ari diren gai bakarra. Era berean, Garamendik berak urte hasieran bidalitako itsasertzaren kudeaketari eta migrazioari buruzko transferentzia proposamenak lantzen hastea ere planteatu du ministroak. Izan ere, Sanchezek politika orokorreko osoko bilkuran esan zituen lau gaietako bi ezin dira transferitu. Garamendik bere eszeptizismoa azaldu du iragarpen horren aurrean, ministroak ez baitu bere iragarkiarekin batera proposamen zehatzik edo dokumentu juridikorik aurkeztu.

Garamendik adierazi duenez, gertaerek erakusten ari dira borondate politikorik ez dagoela eskualdaketa horiei ekiteko. "Mahai gainean jarri dut  Espainiako Gobernuak berak proposatutako transferentzien egutegian bertan agertzen diren gai guzti-guztiak jorratzeko beharra. Hitzetatik pasatzeko ordua dela uste dugu, baina denbora asko daramagu entzuten, ekintzarik ikusi gabe ", zehaztu du komunikabideen galderei erantzunez ministroarekin izandako bileraren amaieran. "Ekintzetara pasatzea da kontua". Guk badakigu nola kudeatu gure politika publikoak. Oso errotuta dagoen zerbait dugu: emandako hitza betetzea. Eta emandako hitza ez da betetzen ari. Estatutu bat dugu, bizikidetza kontratu bat ", gogorarazi du.

Garamendik esan du Espainiako Gobernuari helarazi zizkion "proposamen guzti-guztiek" Gernikako Estatutuan "ainguratuta" daudela. "Beraz, bidalitako proposamenen bideragarritasun juridikoa erabatekoa da eta uste dut eztabaidaezina dela horiei heldu behar zaiela", gaineratu du. Zentzu horretan, transferentziei ez ezik, transferentziak negoziatzeko aukerari ere atea alde bakarretik ixtea aurpegiratu dio. “Estatutuak ematen du bideragarritasun juridikoa. Estatutua Herri honek emandako hitza da, Estatuarekin zuen bizikidetza kontratua, eta, gaur egun, Estatuak ez du bere zatia bete”, amaitu du Sailburuak.

Oraindik ez dago iruzkinik
Iruzkinak itxita daude dokumentu honetan
Ekitaldiko kargudunak