Laneko sailburuordeak ORPri eskatu dio administrazioak eta gizarte-eragileak inplika daitezela laneko arriskuak prebenitzeko

2022-08-04
  • Osalanekin eta Laneko Ikuskaritzarekin batera, Euskadin prebentzioaren arloan egindako aurrerapenak azaldu ditu nazioarteko adituen aurrean

 

  • Iragarri du datorren Nazioarteko Biltzarra Bilbon egingo dela 2023ko apirilean

 

Laneko eta Gizarte Segurantzako sailburuorde Elena Pérez Barredok Kolonbian eskatu du administrazio publiko guztien eta gizarte-eragileen inplikazioa laneko arriskuen prebentzioan, langileen osasuna zaintzeko bermerik onena den aldetik, 2026ko Laneko Segurtasun eta Osasunerako Euskal Estrategia berrian aurreratu den bezala.

Pérez Barredok hitzaldi bat eman du ‘Administrazio publikoek laneko arriskuen prebentzioan duten zeregina’ gaiari buruz. ORP Nazioarteko Fundazioak (Occupational Risk Prevention) Cartagena de Indiasen (Kolonbia) egin duen lehenengo biltzarrean, Lourdes Íscar Osalaneko zuzendari nagusiak ‘Estrategia, segurtasun- eta osasun-politikak sustatzaile gisa’ gaiari buruz hitz egingo du, eta Euskal Autonomia Erkidegoko Laneko Ikuskaritzako zuzendariorde Icíar Gonzálezek ‘Prestakuntza, osasun- eta segurtasun-kulturaren zutabea’ gaiari buruzko mahai-inguru batean parte hartuko du.

ORP nazioarteko erakundea da, independentea eta irabazi asmorik gabekoa, eta lan-bizitzaren kalitatea hobetzeko eta enpresen berrikuntza hobetzeko konpromisoa du. Azterlanak, bilerak, mintegiak, udako eskolak, sinposioak, kongresuak eta prestakuntza-planak sustatzen ditu, sektore ekonomikoak bultzatzeko eta enpresa-sarearen produktibitatea eta lehiakortasuna eta lan-bizitzaren kalitatea hobetzeko. 22. biltzarrak Amerikako eta Europako gobernu eta adituen parte-hartzea izango du, eta "Prebentzio jasangarria" izango du izenburu. Datorren urteko apirilean egingo da, Bilbon, Laneko Segurtasun eta Osasunaren Munduko Egunean eta Osalanen 30. urteurrenean.

Edizio honetan gai hauek jorratzen dira: lan-erakunde berriak, langileen osasun mentala, ordutegiak, etxetik lantokirako distantziak, elikadura, karbono-aztarnen eta aztarna hidrikoen erabilera eta abusua, produktu kimiko berriak, nano produktuak eta nano materialak, adimen artifiziala eta teknologia berriak.

Testuinguru horretan, sailburuordeak prebentzio-kultura berri baten eta prebentzio-estrategien paradigma-aldaketa baten beharra defendatu du, lantokiei buruz hitz egiteaz gain, pertsonengan arreta jartzeko eta edozein dela lan egiten duten lekua. “Horrela diseinatu dugu Euskal Estrategia: zeharkakoa, integrala, laneko osasuna ekintza publiko bakoitzaren ardatz nagusi gisa kokatzen duena, eta pertsona jardueren ardatz gisa hartzen duena. Estrategia hori esku hartzen duten eragile guztiekin diseinatu dugu, prebentzio-zerbitzuekin zein gizarte-eragileekin, segurtasun eta osasuneko ibilbide-orri bat izan dadin errealitate ekonomiko berriaren, enplegu berrien, biztanleria landunaren errealitate demografikoaren eta ezinbesteko genero-ikuspegiaren aurrean, osotasun fisikoa eta psikikoa desberdintasun-faktore erantsi bat izan ez dadin. Eta administrazio publikoek gidatu behar dugun zerbait da, baina ezin izango dugu lortu eragile horien guztien inplikaziorik gabe”, adierazi du Pérez Barredok.

 

2 iruzkin
  • @osalanEJGV
    2022-08-04

    Comentario de Twitter:
    La viceconsejera de Trabajo apela ante la ORP a la implicación de administraciones y agentes social... https://t.co/kpRBp0MZPJ

  • @EditaOla
    2022-08-04

    Comentario de Twitter:
    osalanEJGV: La viceconsejera de Trabajo apela ante la ORP a la implicación de administraciones y agentes social... https://t.co/DKvSwRErhO

Iruzkinak itxita daude dokumentu honetan
Ekitaldiko kargudunak