Berriak Osasun eta Kontsumoa
Eu

Kontsumobide eta telefono-operadore nagusiek hitzarmen bat sinatu dute erreklamazioak arintzeko, kudeaketa telematikoa erabilita

2011.eko urriak 28

Kontsumobidek (Kontsumoko Euskal Institutua) lankidetza-hitzarmena sinatu du telefono-operadore nagusiekin, esparru horretako erreklamazio-izapideak arintzeko, kudeaketa telematiko bidez.

Akordio hori Ana Collía Kontsumobideko (Kontsumoko Euskal Institutua) zuzendariak eta Euskalteleko, Movistareko, Orangeko, eta Vodafoneko arduradunek izenpetu dute. Horrekin, EAEko kontsumitzaile eta erabiltzaileek egindako erreklamazioak izapidetzeko eraginkortasuna hobetu nahi da.

Sinatzaileen esanetan, hau da xedea: "postazko bidea ordezkatzea bide telematikoa erabilita, kudeaketa azkarrago eta eraginkorrago bat zabalduz". Horrela, Kontsumobidetik posta elektronikoz bidalitako erreklamazioei ahalik eta azkarren bide hori bera erabilita erantzuteko konpromisoa hartzen dute telefono-operadoreek. Kontsumobide baita gai horretan eskumena duena, eta bera arduratuko da erreklamazioa egin duen pertsonari erantzuteaz.

2011ko lehenengo zatian jasotako 12.061 erreklamazioetatik, telekomunikazioen sektorea izan zen, hain zuzen, erreklamaziorik gehien eragin zituena: 5.277. Horrek kexa guztien lautik bat esan nahi du; %31,61 igo da, 2010eko gari berarekin konparatuz gero.

Zehatzago esanda, telefonoko alta eta bajekin zerikusia duten arazoak dira erreklamaziorik gehien jasotzen dituztenak; eta atzetik jarraitzen die iraunkortasun-klausulek eta beste konpainia batera egindako garraiagarritasun-prozesuek.
Kontsumobidek azpimarratu nahi du informazioa dela kontsumo-gaietako esperientzia txarrak gutxitzeko baliabiderik egokiena, batez ere, egungo krisi-garaian. Gauzak horrela, zenbait kontu gogoraraztea komeni da:

Bajak eta iraunkortasun-klausulak

Pertsona orok jakin behar du nahi duenean eskatu dezakeela baja bere konpainian, eta hark gauzatu egin behar duela bi egun baliodunen buruan. Baina, arreta berezia jarri behar zaie kontratuetan, askotan, sartzen diren iraunkortasun-klausulei. Klausula horietan ezartzen baita zenbat denboran eutsi behar dion, gutxienez, erabiltzaileak telefono-erakundearekin duen kontratuari.

Epea amaitu baino lehen baja eskatzen badu, konpainiak eska diezaioke erabiltzaileari, epe hori betetzeko hartu zuen konpromisoagatik jasotako onurak ordaintzeko. Dena dela, gai hori aurrez finkatu eta zehaztu beharko da kontratuan, eta hala eta guztiz ere, telefono-konpainiak betegabe utzitako iraunkortasun-aldiko zati horren zenbateko proportzionala, soilik, eskatu ahal izango du.

Baja-eskaera kontratuan ezarritako bidea erabiliz aurkeztuko da, eta erabiltzaileari bermatu egin beharko dio, uneoro, eskaera aurkeztutako eguna eta haren edukia egiaztatzeko modua.

Altak, bajak eta garraiagarritasuna

Erabiltzaileak beti izango du bere telefono-zenbakiari eusteko eskubidea, nahiz eta konpainiaz aldatu. Garraiagarritasuna esaten zaio horri, eta konpainia berrian eskatu beharko da, eta hura arduratuko da egin beharreko izapide guztiak egiteaz, aurrekoari baja ematekoak, besteak beste. Garraiagarritasuna ukatu daiteke irregulartasunen bat edo beste ikusiz gero, esaterako: eskaeran osatu gabeko edo okerreko datuak egotea; ordainketaren bat ez egitea; garraiagarritasuna, aurrez, beste konpainia bati eskatu izana; helbide-aldaketa, telefono finkoa denetan; SIM txartela lapurtu izanagatik edo galtzeagatik salaketa jarri izana...

Erabiltzaileak ez badu telefono-zenbakiari eusteko asmorik, ez da nahikoa konpainia berrian izena ematea, horrez gain, aurretik zerbitzua ematen zion konpainian baja ematea ere eskatu behar da. Telefono finkoari dagokion konpainia-aldaketan, berriz, beste operadorearekin zerbitzua kontratatzea komeni da aurrekoari baja eman aurretik, zerbitzua aktibo egon dadin bien bitartean.

Gomendio orokorrak

Amaitzeko, Kontsumobidek (Kontsumoko Euskal Institutuak) zenbait gomendio orokor eman nahi ditu, kontsumo-ekintzaren bat egin aurretik informatzea zer garrantzitsua den konturatzeko. Gomendio hauek baliagarriak dira, bai telekomunikazioen sektorerako, bai beste edozeinetarako:

 Kontratuak astiro-astiro irakurri; jarri behar den arreta klausula guztietan, baita datu pertsonalak babesteari buruzkoetan ere.
 Ez heldu promozio guztiei.
 Ziurtatu publizitate-kanpainak argiak eta egiazkoak direla, eta beharrezko informazio guztia dutela.
 Norberaren benetako beharren arabera kontratatu zerbitzuak, eta adi egon jakiteko zein konpainiak edo enpresak eskaintzen dituen baldintzarik onenak, gastu-tipologia kontuan izanda.

Oraindik ez dago iruzkinik
Iruzkinak itxita daude dokumentu honetan