Berriak Lehendakaritza

Lehendakariak astelehenean aurkeztuko du New Yorkeko High Level Political Forumean Nazio Batuen Local2030 Koalizioaren Idazkaritzaren egoitza Euskadin kokatzeko proiektua

2022-07-08
  • Nazio Batuek berariaz diseinatu dute Local2030, GJHak betetzen laguntzeko estatuz azpiko eremuan (lokalizazioa)
  • Lehendakaritzak biziki bultzatu du Euskadiko hautagaitza aurkezteko prozesua, 2021eko hasieratik.
  • Proposamenean Bilboko Udalak, BBK Fundazioak eta Espainiako Gobernuak ere parte hartzen dute
  • Proposamena onartuz gero, Local2030 erreferentzia orokorreko egoitza Euskadiko Artxibo Historikoaren Bilboko eraikineko seigarren solairuan kokatuko litzateke
  • Eusko Jaurlaritzak espero du proiektuari aldeko erantzuna ematea eta Nazio Batuen Local2030 egoitza aurten bertan inauguratzea

Datorren astelehenean, uztailak 11, Iñigo Urkullu Renteria Lehendakariak ofizialki aurkeztuko du New Yorkeko High Level Political Forumean (HPLF 2022) Euskadin, Bilboko hirian, Nazio Batuetako Local2030 Koalizioaren Idazkaritzaren egoitza kokatzeko proiektua.

HLPF edo Goi Mailako Foro Politikoa gobernuen arteko urteroko topaketa da, eta herrialdeek Garapen Jasangarrirako Helburuak lortzeko aurrerapenari buruzko informazioa ematen dute. HLPF 2022 uztailaren 5etik 15era garatzen ari da New Yorken.

Local2030 Koalizioak Bilbon egoitza izateko proiektuaren aurkezpena bideo baten bidez egingo da. Bertan, Lehendakariaz gain, Juan Mari Aburto Bilboko Alkateak eta, Espainiako Gobernuaren izenean, José Manuel Albares Kanpo Arazoetako Ministroak eta Jone Belarra Gizarte Eskubideen eta 2030 Agendaren Ministroak hartuko dute parte.

2030 Agendaren eta haren 17 Garapen Jasangarrirako Helburuen (GJH) lokalizazio-prozesu globalaren bidez, Agenda planetako tokiko, eskualdeko eta estatuz azpiko gobernu bakoitzean ezartzeko konpromisoa errotu nahi da, erakunde-maila guztien arteko koherentzia sustatuz eta lankidetza publiko-pribatua eta soziala mugiaraziz.

Helburu horrekin, Nazio Batuek Local2030 Koalizioaren plataforma bultzatu dute, UN-Habitat erakundeak eta, txandaka, Nazio Batuen beste agentzia batzuek gidatuta. Local2030 espresuki diseinatu da GJHak betetzen laguntzeko eta bizkortzeko estatuz azpiko eremuan (lokalizazioa). Esparru horretan gauzatzen dira 2030 Agendarekin lotura zuzenena duten eskumenen zati handi bat. Koalizio honek bere Idazkaritzarako erreferentziazko egoitza global bat izatea aurreikusi du.

Eusko Jaurlaritzak, Espainiako Gobernuarekin, Bilboko Udalarekin eta BBK Fundazioarekin lankidetzan, Bilboren hautagaitza aurkeztu du Local2030 Koalizioaren Idazkaritzaren egoitza hartzeko. Proposamena onartuz gero, egoitza hori Euskadiko Artxibo Historikoaren Bilboko eraikinaren seigarren solairuan kokatuko litzateke.

Lehendakaritzak biziki bultzatu du Euskadiko hautagaitza aurkezteko prozesua 2021eko hasieratik. Urte luze honetan, harreman eta elkarrizketa ugari izan dira, hasiera batean Espainiako Gobernuarekin eta Nazio Batuekin, eta azken etapan Bilboko Udalarekin eta BBK Fundazioarekin.

Aurkeztutako proiektua akordio baten emaitza da. Eusko Jaurlaritzak eskerrak eman nahi dizkie Kanpo Arazoetako Ministerioari, Gizarte Eskubideen  eta 2030 Agendaren Ministerioari, bai eta Bilboko Udalari eta BBK Fundazioari ere.

Proiektua aurkeztu ondoren, Nazio Batuen Local2030 Koalizioari dagokio, ONU-Habitat erakundeak eta, aldi horretan, Garapenerako Nazio Batuen Programak (NBGP) batera, hautagaitza horri buruzko behin betiko erantzuna ematea. Eusko Jaurlaritzak espero du aldekoa izatea, eta Nazio Batuen Local2030 Koalizioaren Idazkaritzaren euskal egoitza aurten bertan inauguratu ahal izatea.

 

Elkarrizketa Radio Vitorian

Nazio Batuen Erakundearen Local2030 Koalizioaren Idazkaritza Euskadin kokatzeko proiektuaren aurkezpenaren harira, Jonan Fernandez Eusko Jaurlaritzako Trantsizio Sozialaren eta 2030 Agendaren idazkari nagusiak Radio Vitorian gaur adierazi duenez, “2030 Agendaren lokalizazioaren arloan eta erakundeen arteko lankidetzaren, lankidetza publiko-pribatuaren eta gizarte zibilarekin partekatutako lanaren arloan Euskadin egindako ibilbidea dela-eta, Bilbo kokapen egokia da Nazio Batuen Erakundearentzat”.

Gogorarazi duenez, Europako Batzordeak Euskadi GJHak ezartzen aitzindaria den eskualde gisa zela adierazi zuen. Eusko Jaurlaritza izan zela “2017an Nazio Batuen Erakundean Urteko Jarraipenerako Borondatezko Txostena aurkeztu zuen lehen gobernu ez-estatala. Euskadik dagoeneko bost txosten aurkeztu ditu urtero, eta buru jarri da autoebaluazioko txosten-mota horren aurkezpenean”.

Izan ere, ez da hau Eusko Jaurlaritza Nazio Batuen Goi Mailako Foro Politikoan egongo den lehen aldia. 2018an eta 2019an ere HLPFn parte hartzeko gonbidapena jaso zuen. Zehazki, 2019an, Iñigo Urkullu Renteria Lehendakariak aurrez aurre aurkeztu zuen Euskadin bonu jasangarriak jaulkitzeko esperientzia, Nazio Batuek New Yorken duten egoitzan.

Trantsizio Sozialaren eta 2030 Agendaren idazkari nagusiak gaineratu duenez, Eusko Jaurlaritza Regions4 sareko burua da egun, garapen jasangarriaren alde lan egiten duten lau kontinentetako 41 gobernu erregionalez osatutako nazioarteko sarean. “Euskadik eta bere erakundeek 2030 Agendaren lokalizazioarekin duten ibilbidea eta konpromisoa adierazten duten datuak dira, eta Nazio Batuen Erakundean aurkeztutako hautagaitza indartzen dute”.

Jonan Fernandezek azaldu duenez, Eusko Jaurlaritzak bi helburu lortu nahi ditu Local2030 Koalizioaren egoitza Bilbon kokatzeko proiektu honekin. Alde batetik, “Nazio Batuekin aktiboki lankidetzan aritzea, Local2030 Koalizioaren Idazkaritzak ahalik eta hobekien bete ditzan bere helburuak eta eginkizunak”.

Bigarren helburua –azpimarratu du– Euskadi nazioarteko erreferente gisa indartzea da, Garapen Jasangarrirako Helburuen lokalizazioan eta 2030 Agendak ordezkatzen dituen eraldaketa sozialekiko, ekologikoekiko eta ekonomikoekiko konpromisorako”.

2 iruzkin
  • 2022-07-09

    Gehiago ezagutaraztea praktikan jarritako adibideekin, aurrezkiak aipatuz gainera, garapen jasangarriaren helburuak araudi orotan txertatzea, planeta bakarra bizi dela azpimarratuz.

  • 2022-07-09

    dar más a conocer con ejemplos también puesta en práctica con mención además a los ahorros, objetivos desarrollo sostenible incorporación a toda normativa destacando que planeta vivimos sólo hay uno.

Iruzkinak itxita daude dokumentu honetan
Komunikabideek behera kargatzeko
Ekitaldiko kargudunak