Berriak Hezkuntza

Hezkuntza Sailak 220 Ikasiker beka deituko ditu, ikerketa lanetan lagundu nahi duten unibertsitate-ikasleentzat

2022-06-17
  • 000 euro bideratu ditu ikasturtean zehar edo uda garaian burutu daitezkeen lankidetzatarako
  • Ikasle bekadunek euskal ikerketa sistemako zentroetan eman ahal izango dute laguntza

Hezkuntza Sailak prest du dagoeneko 2022-2023 ikasturterako ikerketa lanetan laguntzeko Ikasiker beken deialdi berria. Beka hauek arautzen dituen Agindua Jaurlaritzaren Gobernu Kontseiluaren azken bileran onartu da, joan den ekainaren 14an. Hezkuntza Sailak 330.000 euro bideratzen ditu deialdi honetarako.

Hezkuntza Sailaren Ikasiker programaren helburua da unibertsitate ikasleei aukera ematea euskal ikerketa-sisteman egiten den oinarrizko ikerketaren eta ikerketa aplikatuaren arloko lanetan lehen urratsak egiten has daitezen.

Unibertsitate ikasleei zuzenduta deitzen dira Ikasiker bekak, ikasketekin aldi berean (2023ko urtarrilaren 1etik irailaren 30era bitartean) honako ikerketa talde hauetan laguntza emateko prest dauden ikasleentzat: Euskal Unibertsitate Sistemaren ikerketa taldeetan, Oinarrizko Ikerketa eta Bikaintasun Zentroetan (BERC), Ikerketa Sanitarioko Institutuetan (ISI), Ikerketa Kooperatiboko Zentroetan (IKZ)  edo Zientzia, Teknologia eta Berrikuntzaren Euskal Sareko zentro teknologikoetan, betiere BRTA partzuergo zientifiko-teknologikoari atxikita badaude eta Eusko Jaurlaritzak onetsitakoak eta Zientzia, Teknologia eta Berrikuntzaren Euskal Sareko agente gisa egiaztatutakoetan.

330.000 euroko diru-kopuruarekin, 220 beka eskainiko dira, honako modalitate hauetan:

  • A modalitatea, ikasturtean zehar, 2023ko urtarriletik ekainera: 165 beka.
  • B modalitatea, udan, 2023ko ekainetik irailera: 55 beka

Beka hauek eskuratu nahi dituzten ikasleek unibertsitateko graduko titulazio ofiziala lortzera bideratutako ikasketa-plan bateko azken bi urteetako batean matrikulatuta egon beharko dute, Euskal Unibertsitate Sistemako unibertsitate batean. B modalitatearen kasuan, Master ofizialeko ikasleak ere izan daitezke. Bekaren onuradun izateko, Euskadin izan beharko dute administrazio-egoitza, eta lankidetza proiektu bat aurkeztu, lankidetza hori gauzatu nahi den ikerketa zentroak behar bezala ziurtatua.

Deialdi honetara eskaerak aurkezteko epea uztailaren erdi aldera irekiko du Hezkuntza Sailak.

Oraindik ez dago iruzkinik
Iruzkinak itxita daude dokumentu honetan
Komunikabideek behera kargatzeko
Ekitaldiko kargudunak