“Euskadi Bono Denda”ren edizio berriak 640.000 deskontu-bonu jarriko ditu zirkulazioan ekainaren 2tik uztailaren 3ra

2022-06-01
  •  Euskadi Bono Denda ekimenaren hirugarren edizioa bihar jarriko da abian, 6,4 milioi eurorekin, Eusko Jaurlaritzak emandako 5 milioiei 1,4 milioi gehitu dizkieten udalen eta aldundien atxikipenari esker

Turismo, Merkataritza eta Kontsumoko sailburu Javier Hurtadok Euskadi Bono Dendaren hirugarren edizioa aurkeztu du gaur, Cristina González Arabako Foru Aldundiko Enplegu, Merkataritza eta Turismoko diputatuarekin eta Maider Etxebarria Gasteizko Udaleko Ekonomia Sustapen, Enplegu, Merkataritza eta Turismoko zinegotziarekin batera.

Sailburuak eskerrak eman ditu atxikitako udal eta aldundien ahaleginagatik, “merkataritza-bonua indartzeko garrantzitsua delako, bere saltokiei baliabide eta bonu gehiago ematen laguntzen dielako eta, beraz, bere lurraldeetako hiri-ekonomia bultzatzen laguntzen duelako”.

Aurtengo ediziora Arabako eta Bizkaiko Foru Aldundiak, Gasteizko udala eta Arrasate, Derio, Gueñes, Hondarribia, Lekeitio, Portugalete, Santurtzi, Urretxu eta Zumarragako udalerriak elkartu dira.

Sailburuak gogorarazi duenez, Euskadi Bono Dendaren hirugarren edizioa merkataritzari laguntzeko ahaleginean kokatzen da, “zailtasun handiko une hauetan. Digitalizazioari, kontsumo-ohituren aldaketei eta ordaintzeko modu berriei aurre egiten ari zitzaien erronkei pandemia bat gehitu zaie, eta, orain, Ukrainaren inbasioa, prezioei eta kostuei eragin diena eta produktu batzuen kontsumoa atzeratu duena. Egoera horretan, Eusko Jaurlaritzatik, aparteko funtsetatik 20 milioi euro bideratuko ditugu tokiko merkataritzara, 15 milioi zuzeneko laguntzetan eta 5 milioi kontsumorako bonuetan; hain zuzen ere, horiek dira bihar abian jarriko direnak, eta atxikitako erakundeek 1,4 milioi euro gehitu dizkietenak”.

Deialdi honetan tokiko merkataritzako edo zerbitzuetako 4.400 establezimendu atxiki dira, 517 Araban, eta horietatik 396 Gasteizen daude. Arabari, guztira, 75.000 bonu dagozkio lurralde-banaketagatik. Horrez gain, Arabako Foru Aldundiak beste ia 19.000 bonu gehitu ditu, eta udalak 7.100 bonu gehigarri, Gasteizko saltokietarako.

Cristina González diputatuak azaldu duenez, “programa honi 200.000 euro gehituko dizkiogu, Arabako denden eskura ia 19.000 bonu gehigarri jartzeko. Helburua argia da: Arabarren kontsumoa sustatzea gure tokiko txikizkako merkataritzan eta, horrela, gure herri eta hirietako enplegua eta gizarte-bizitza sortzeko funtsezko sektore bati laguntzea”.

Maider Etxebarria alkateordeak, berriz, hauxe gogorarazi du: “berriro ere, erakundeek indarrak batzen ditugu eta konponbideak planteatzen ditugu gure ekonomia-sarea berraktibatzeko. Dei egiten diegu herritarrei tokiko merkataritzaren alde egin dezaten, gurearen alde, betikoaren alde, gure kaleei bizia ematen dienaren alde, eta irauli egin den saltokiaren alde, Euskadi Bono Dendaren edizio berri honetan parte hartzeko”.

Bonuaren funtzionamendua aurreko edizioetakoaren antzekoa da: 10 euroko deskontuak 30 eurotik gorako erosketetan, % 30eko deskontua erosketetan eta 16 urtetik gorako pertsona bakoitzak 5 bonu izango ditu tokiko zerbitzu eta merkataritzako establezimenduetan trukatzeko.

Erabiltzaileak, aldez aurretik, euskadibonodenda.eus webgunean informazioa jaso ahal izango du, bere udalerrian edo joaten den beste batean zein saltoki dauden atxikita egiaztatzeko. Bestela ere, saltokian ikusi ahal izango ditu zintzilik atxikipen-kartelak.

www.euskadibonodenda.eus

 

Oraindik ez dago iruzkinik
Iruzkinak itxita daude dokumentu honetan
Ekitaldiko kargudunak