Berriak Segurtasuna

Eusko Jaurlaritzak 30.000 euroko dirulaguntza emango dio Bizkarrezur Muineko Lesioa Aztertzeko Elkarteari

2022-05-25
  • Laguntza trafiko-istripuek eragindako lesio itzulezinak saihesteko sentsibilizazio-jarduerak egiteari lotuta dago
  • AESLEME elkarteak Eusko Jaurlaritzarekin lankidetzan garatzen du “Gerta dakizuke / Te puede pasar a ti” bide-segurtasuneko programa

Eusko Jaurlaritzak oniritzia eman dio AESLEME Bizkarrezur Muineko Lesioa Aztertzeko Elkarteari 2022ko ekitaldirako 30.000 euroko dirulaguntza emateari, bide-segurtasunaren arloan formakuntza, sentsibilizazioa eta ikerketa sustatzeko.

AESLEME irabazi asmorik gabeko erakunde bat da, erakunde eta organismo publikoen ohiko laguntzailea da, eta trafiko-istripuek eragindako lesio itzulezinen prebentzioan dihardu, bere prebentzio-kanpainen eta kanpaina hezitzaileen bidez.  

Dirulaguntza horren bitartez, Jaurlaritzak AESLEMErekin elkarlanean garatzen du Euskadiko Bigarren Hezkuntzako ikasleei zuzendutako bide-segurtasuneko “Gerta dakizuke / Te puede pasar a ti” programa. Modu horretara, bizkarrezur-muineko lesioak dituzten pertsonak ekimenera atxikitako ikastetxeetara joaten dira lehenengo pertsonan azaltzeko errepideko arriskuak eta trafiko-istripuek betiko eragin ditzaketen ondorioak.

Aipatutako dirulaguntzaren helburua da, hain zuzen ere, jarduera horiek finantzatzea, eta AESLEMEk urteko memorian zehaztu beharko ditu.

Eusko Jaurlaritzako Segurtasun Saileko Trafiko Zuzendaritza arduratuko da dirulaguntza kudeatzeaz.

Oraindik ez dago iruzkinik
Iruzkinak itxita daude dokumentu honetan
Komunikabideek behera kargatzeko
Ekitaldiko kargudunak