URAk Barakaldoko Gorostizan Galindo ibaiaren erriberak lehengoratzeko lanak lizitatu ditu

2022-05-18
  • Proiektuaren jarduera-eremua Gorostizako kiroldegiaren ondoan porlanak estalitako 200 metroko ibai-tarte bat da
  • Lizitazio-aurrekontua 400.000 €-koa da, eta gauzatzeko aurreikusitako epea 3 hilabetekoa.

URA-Uraren Euskal Agentziak, Eusko Jaurlaritzako Ekonomiaren Garapen, Jasangarritasun eta Ingurumen Sailari atxikita dagoenak, Barakaldoko Galindo ibaiaren 200 metroko zati bat leheneratzeko obren lizitazioa ireki du, Gorostiza auzoaren parean. Kiroldegiaren ondoan dago, eta gaur egun porlanez estalita eta ubideratuta dago. Proiektu honek Eskualde Garapeneko Europako Funtsaren (EGEF) finantzaketa du, 400.000 euroko aurrekontua du BEZa barne eta hiru hilabeteko egikaritze-epea du.

Jarduketa horri esker, gaur egun ibaiertzak estaltzen dituen hormigoia zati batean kendu ahal izango da, ezpondak jarri, ibilguaren bihurgunea eta zimurtasuna areagotu, tartea landareztatu, ahalmen ekosistemikoa handitu eta Barakaldoko auzoaren hiri-bilbetik igarotzen den ibai baten paisaia nabarmen hobetu ahal izango da. Helburua da ibaiaren erriberak egoera erdi-naturalean egokitzea: bi ertzak, ahal dela, hormigoizko estalkiaren ordez,  lurrez eta ibaiertzeko landarediaz osatuta izateko. Izan ere, hormigoizko erriberetan ibaiaren bizitzak ez du  habitat egokirik.

Obra egiten denean, lehenik eta behin, Galindo ibaiko urak desbideratuko dira: bai funtzionamendu hidraulikorako, bai tarteko fauna eta flora babesteko. Ondoren, ezponda eta haren oinarriaren zati batzuk eraitsiko dira; baita erabiltzen ez den presa txiki bat ere, proiektuaren jatorritik 38 metro gorago; zein eustorma bat, proiektuaren ondoan dagoena. Hirugarrenik, erriberako zati batzuk induskatuko dira; ibaiertzaren oinean babes-obrak egingo dira, edo betelan txikiak egingo dira hormigoizko estalkia kendu eta ibaiertzeko landarediaren jarraitutasun harmoniatsua lortzeko beharrezkoa den lekuetan.

Oraindik ez dago iruzkinik
Iruzkinak itxita daude dokumentu honetan
Komunikabideek behera kargatzeko
Ekitaldiko kargudunak