Arriolak Bilboko Metroaren L5 eraikitzeko akordioa balioetsi du, herritarrek “aspalditik espero izan duten” proiektua

2022-02-23

ñaki Arriola Lurralde Plangintza, Etxebizitza eta Garraioetako sailburuak Eusko Jaurlaritzaren eta Bizkaiko Foru Aldundiaren arteko Bilboko Metroaren L5-a eraikitzeko akordioaren balioa azpimarratu du asteazken honetan. Akordioaren bidez, funts propioekin ordainduko da línea berria, Next Generation funtsen zain egon gabe, Galdakao trenaren bidez lotzeko eta Durangaldean eta Busturialdean ere mugikortasuna hobetzeko. Herritarrek denbora luzez itxarondako proiektua da, nabarmendu duenez, eta nahiz eta “kostu eta konplexutasun tekniko handia” izan, bi erakundeek laster martxan jarriko dute.

Arriolak bere sailaren proiektuak eta gaurkotasun politikoa aztertu ditu Radio Euskadiko Boulevard saioan egindako elkarrizketan. Solasaldian, sailburuak nabarmendu du L5aren akordioan Patxi Lopezen agintaldian aztertzen ari zen alternatiba baten aldeko apustua egin dela eta azpimarratu du “garrantzitsuena erakundeen arteko akordioa dagoela”. Horrek 360 milioiko inbertsio-ahalegin handia dakar, eta horri Euskotrenen sarearekiko loturaren kostua gehitu beharko zaio. Lau zati izango ditu proiektuak, eta horietako bi (Sarratu-Aperribai, Aperribai-Galdakao) udaberrian Eusko Jaurlaritzaren eta Bizkaiko Foru Aldundiaren arteko hitzarmena sinatu ondoren lizitatuko dira.

Sailburuak adierazi du lanak urte hau amaitu baino lehen has daitezkeela, eta nabarmendu du L5ean azkar egin ahal izango dela aurrera, informazio-azterlana eta eraikuntza-proiektuak onartuta baitaude. Azaldu duen bezala, L4aren garapena beste puntu batean dago, izan ere, honek amaitu berri du bere parte-hartze prozesua, herritarrek alternatibei buruzko iritzia eman ahal izateko. “Aurki informazio-azterlana onartuko dugu eta eraikuntza-proiektuak bultzatuko ditugu”.

Eskumenen transferentziak

Arriolak nabarmendu duenez, Espainiako Gobernuaren eta Eusko Jaurlaritzaren arteko agenda transferentziarik gabe urte asko eman ditu, Espainiako Gobernuak Eusko Jaurlaritzari eskumenak transferitu gabe. Horregatik balioetsi du orain transferentzia garrantzitsuak egiten ari direla, espetxeena kasu. Beste batzuk ere mahai gainean daude, hala nola trenbide-ingurukoak. Aldiriko trenei dagokienez, sailburuak zehaztu du Espainiako Gobernuarekin akordio bat lortzeko lanean ari direla.

Abiadura handiko trena

Sailburuak berretsi du abiadura handiko trena 2027an amaituta egongo dela Euskadin, nahiz eta Gasteizen eta Bilbon horren integrazioa beranduago amaitu. Ildo horretan, nabarmendu du Eusko Jaurlaritzak paper aktiboa duela bi hiriburuetako sarbideen obretan parte hartzeko, eta iragarri du laster Bilbora sartzeko obrak kudeatzeko gomendioa (Zaratamo-Cantalojas zatia) sinatuko duela Garraioetako ministroarekin.

Alokairuko etxebizitza babestua bultzatzea

Sailburuak azaldu duenez, etxebizitzaren arloan, Saila lanean ari da eragile publiko, sozial eta pribatuekin Etxebizitzaren aldeko Itun Sozial berri bat sinatzeko, 15 urterako akordio bat, non guztiek lan egingo duten azken hamarkadan erabat aldatu den herritarren eskariari erantzuteko, hau da, alokairua bultzatzeko, alokairuko parke publikoa bikoizteko xedearekin.

Ildo horretan, Arriolak azpimarratu du bere sailaren mende dagoen Euskal Trenbide Sareak  eraikitzen duen Donostiako trenbide-pasagunearen proiektuari esker, Donostian aukera bat sortu dela, Easo inguruan zoruak libre utzita. “Guk sortu dugu aukera hori Garraioen arlotik eta, Etxebizitzaren arlotik, asko dugu esateko hemen sortuko diren etxebizitzen diseinu eta tipologiaren inguruan”, aditzera eman du. “Donostiako etxebizitza premia eta eskaria kontuan hartuta, gure aukera da egin beharreko garapen horretan etxebizitza babestua bultzatzea”, nabarmendu du, “aukera handia da hiriarentzat, ez bakarrik hirigintzaren aldetik, baita etxebizitza bat eskuratzeko aukera gisa ere”.

Oraindik ez dago iruzkinik
Iruzkinak itxita daude dokumentu honetan
Ekitaldiko kargudunak