Berriak Lehendakaritza

Eusko Jaurlaritzak bere Euskadi Basque Country 2025 estrategia aurkeztu dio kidego diplomatikoari

2022-02-17

Eusko Jaurlaritzako Kanpo Harremanetarako Idazkaritza Nagusiko arduradunek bilera telematiko bat izan dute gaur goizean zenbait herrialdetako enbaxadetako ordezkariekin, Nazioartekotzeko Esparru Estrategia – Euskadi Basque Country 2025 aurkezteko.

Bideokonferentzia bidez egin den topaketa birtualean, Marian Elorza Kanpo Harremanetarako idazkari nagusiak eta Myriam Larroulet Eusko Jaurlaritzako Kanpo Harremanetarako zuzendariak parte hartu dute, bai eta Frantzia, Alemania, Erresuma Batua, Italia, Suedia, Danimarka, Finlandia, AEB, Mexiko, Txile, Kolonbia, Argentina, Kanada, Txina, India, Japonia, Hegoafrika eta Senegaleko enbaxadetako ordezkariek ere.

Lan-topaketak, "NAZIOARTEKOTZEKO ITSAS ESTRATEGIA – Euskadi BASQUE COUNTRY 2025" izenekoak, Eusko Jaurlaritzaren nazioarteko agendak datozen lau urteetan izango dituen gakoak eta ardatz nagusiak aurkezteko balio izan du.

EBC 2025 ESTRATEGIA

Estrategia horrek bide argi bat marrazten du kanpo-ekintza osoari koherentzia emateko, lehentasunezkotzat definitutako lurraldeekin aliantzak eta lankidetza-espazioak ehuntzeko, interesak sustatzeko eta Euskadiren ahotsa erronka globalei heltzen dieten Europako eta nazioarteko topaketa-gune, -sare eta -foroetara eramateko. Gune horietan Euskadik jardunbide egokiak parteka ditzake, ikaskuntzak lor ditzake, nazioarteko proiekzioa indartu dezake eta erronka globalak gure herriarentzat aukera bihurtzen lagun dezake.  

Euskadi Basque Country 2025 zeharkako estrategia bat da, eta, Covid-19aren agertokiak sortutako eredu sozioekonomikoa berreskuratu eta eraldatu ondoren, Euskadiren kanpo-jarduera indartu nahi du, nazioartekotzeko ibilbide-orri komun bat sortzeko, nazioarteko aldaketa geopolitikoetara egokituta, trantsizio digitala eta klimatikoa errazteko, eta estatuz azpiko gobernuen garrantzia handitzea bezalako joerak aprobetxatzeko.

Lehentasunezko eskualde eta herrialde multzo bat identifikatzen da, eta horiekin harremanak indartuko dira eta jarduera-eremu berrietan aliantzak bultzatuko dira. Lehentasunezko herrialdeak dira: Frantzia, Alemania, Erresuma Batua, Italia, Suedia, Danimarka, Finlandia, AEB, Mexiko, Txile, Kolonbia, Argentina, Kanada, Txina, Hego Korea, India, Japonia, Hegoafrika eta Senegal. Eskualde mailan, honako hauek dira lehentasunezko eskualdeak: Akitania Berria, Euskadiko Aglomerazio Mankomunitatea, Flandes, Baviera, Gales, Korsika, Quebec, Querétaro, Cundinamarca eta Jiangsu.

Jardueren multzoa lau ardatz estrategikotan oinarritzen da, dagozkien helburuekin:

1.- Euskadi Basque Country kanpoan hobeto kokatzea.

2.- Ehun sozioekonomikoaren nazioartekotzea bultzatzea.

3.- Europako proiektuan laguntzea eta parte hartzea.

4.- Erronka globalak gainditzeko euskal ekarpena indartzea.

Gaur egin dena Eusko Jaurlaritzaren Madrilgo Ordezkaritzan azken urteotan Eusko Jaurlaritzako arduradunen eta diplomatikoen kidegoko ordezkarien artean egiten ari diren ohiko topaketen egutegiaren barruan dago, Euskadiko plan eta ekimen estrategikoak ezagutarazteko.

Oraindik ez dago iruzkinik
Iruzkinak itxita daude dokumentu honetan
Ekitaldiko kargudunak