Bihar onartuko diren aurrekontuek gazteei enplegua eskaintzeko programak indartuko dituztela aurreratu du lehendakariordeak
- Zumarragan profesional berriei diplomak ematerakoan erakundeen arteko lankidetza nabarmentzen da, zifra handiak pertsonengan inbertitzeko izan daitezen
Idoia Mendia Lehendakariorde eta Eusko Jaurlaritzako Lan eta Enplegu sailburuak gazteen enplegua indartzeko programak aurreratu ditu, bihar Euskal Autonomia Erkidegoko Aurrekontu Orokorrak onartzeari esker posible izango direnak. Izan ere, kontu horiei esker, erakundeen politikak lerrokatu ahal izango dira, zifra handiak inbertitzeko.
Mendiak, Mikel Serrano Zumarragako alkatearekin batera, eskualdeko enpresek eskatutako prestakuntza-arloetan profesionaltasuna ziurtatzen duten diplomak banatu ditu. Alkateak 2018an proposatu zizkion prestakuntza-programak Espainiako Gobernuari, eta Eusko Jaurlaritzak kudeatzen duen Europako Gizarte Funtsaren Gazte Enplegurako Programa Operatiboaren kontura finantzatu dira.
“Ekitaldi txikia da, baina oso garrantzitsua. Adibide bat da elkarlanak, lankidetzak eta baterako ahaleginak, erakundeen arteko lerrokatzeak, funtzionatzen dutela. Eta horri esker ziurtasunak eskaintzen ditugu zalantza eta ziurgabetasun garaietan, arazoak dauden konponbideak aurkitzen ditugu, gazteen langabeziarena kasu”, adierazi du.
Lehendakariordeak gogorarazi du Europako programa hori Europar Batasunaren sorreratik enpleguan inbertitzeko mantentzen den egituretako bat dela, sortzen laguntzeko eta pertsonei aukera hobeak lortzen laguntzeko, batez ere zailtasun handienak dituztenei, hala nola gazteei, azken urteotan 2.000 euskal gazteri prestakuntza eman baitie.
Orain, Funts hori indartu egingo da Gazte Bermea Plus Planarekin. Plan horren bidez, Euskadik proiektu pilotu bat garatuko du beste bi autonomia-erkidegorekin batera, atzo bertan Eusko Jaurlaritzak SEPErekin sinatutako hitzarmen batetik abiatuta. Baina, horrez gain, Idoia Mendiak aurreratu duenez, bihar Legebiltzarrean onartuko diren EAEko Aurrekontuek gazteen enplegurako programak areagotuko dituzte, eta ekimen berritzaileak txertatuko dituzte, hala nola ekosistema birtual bat, enpresek eskaintzen dituzten aukerak gazteen eskariarekin hobeto lotzeko aukera emango duena.
