Berriak Lehendakaritza

Lehendakariak Nazioartekotzeko 2021-2022 BEINT beken 125 ziurtagiriak banatu ditu

2021-12-01
  • Ekitaldi berean aurkeztu da hiru euskal unibertsitateekin sinatutako Hitzarmena, zeinaren bidez BEINT beken programan txertatuko baitira nazioartekotze arloan eskaintzen dituzten ezagutza eta prestakuntza-metodologia onenak

Iñigo Urkullu lehendakariak, Arantxa Tapia eta Jokin Bildarratz sailburuekin batera, Nazioartekotzeko BEINT beken 125 ziurtagiriak banatu ditu gaur goizean. Beka horiek SPRI Taldeko Basque Trade & Investment - Nazioartekotzeko Euskal Agentziak ematen ditu.

Gazte horietatik 45ek atzerriko enpresekin hasiko dituzte beren praktikak, ahal dela atzerrian kokatutako euskal konpainiekin, eta gainerako 80ak Kanpo Sareko bulegoetara joango dira, edo bestela, Nazioarteko Merkataritzaren Sustatzaileen Europako Elkarteak Afrika, Amerika, Asia eta Europako 42 herrialdetan dituen bulegoetara.

Bere hitzaldian, nazioartekotze-beka honek eskaintzen dien aukera aprobetxatzera animatu ditu lehendakariak gazteak, eta Euskadiren garapenean laguntzeko eskatu die. «Esperientzia hau zuen ibilbide profesionalean akuilu izatea espero dut, eta, gainera, mundua eraldatzen eta etorkizun hobea eraikitzen laguntzea», adierazi du. Era berean, Iñigo Urkulluk berariaz dei egin die proiektu honetan parte hartzen duten enpresei bekadunen esperientzia, talentua eta lana aprobetxa dezaten, gaur egun eta etorkizunean.

Urkullu lehendakariak azpimarratu du Eusko Jaurlaritzaren eta euskal ekonomia osoaren helburua dela nazioartekotzea bultzatzea, eta, horregatik, atzerrian merkatuak irekitzeko prozesuan eta nazioarteko enpresekin aliantzak egiten laguntzen ari direla, bereziki enpresa txiki eta ertainen artean. Gainera, prestakuntzan enpresa-munduarekin loturak sustatzeko egiten ari den ahalegina azpimarratu du, bai Prestakuntza Dualaren bidez, bai Unibertsitatea + Enpresa programaren bidez.

Nazioartekotze-beka horiek abian jarri zirenetik 35 urte bete diren honetan, Lehendakariak euskal gizarteak proiektu horren alde egin duen inbertsioa aitortu du, eta adierazi du, nolabait, “euskal gizarteari zor diogu jasotzen duzuen ezagutza eta esperientzia”.

Ekitaldia Barakaldoko BECen egin da, eta bertara bildu dira 125 gazte bekadunak eta euren familiak, indarrean dauden osasun neurri guztiak errespetatuta. Ekitaldian parte hartu dute Arantxa Tapia, Ekonomia Garapen, Jasangarritasun eta Ingurumen sailburuak, Jokin Bildarratz, Hezkuntza sailburuak, Junkal Gutierrez, UPV/EHUko Euskara, Kultura eta Nazioartekotze errektoreordeak, Ekintzailetzako eta Enpresekiko Harremanetako errektorerordea Deustuko Unibertsitateko; Vicente Atxa, Mondragon Unibertsitateko errektoreak, Aitor Urzelai, SPRI Taldeko zuzendari nagusiak eta Ainhoa Ondarzabal, Basque Trade & Investment Agentziako zuzendariak.

Hitzarmena hiru euskal unibertsitateekin

Ekitaldi berean aurkeztu da hiru euskal unibertsitateekin sinatutako Hitzarmena, zeinaren bidez BEINT beken programan txertatuko baitira unibertsitate horietako bakoitzak nazioartekotze arloan eskaintzen dituen ezagutza eta prestakuntza-metodologia onenak.  Lehendakariak eskerrak eman dizkie BEINT beken prestakuntza-faseari atxikitako unibertsitateei. “Indarrak eta gaitasunak batuta prestakuntza osoagoa lortuko dugu”, adierazi du.

Beint bekak

30 urtetik beherako ehun bat gaztek (aurten salbuespen gisa 125 izango dira, 2020an egin gabe utzi zen deialdia konpentsatzeko) aukera izaten dute urtero BEINT beka bat eskuratzeko. BEINT beken helburua da nazioartekotze arloko talentu berriak trebatzea, gai izan daitezen euskal enpresen eta erakundeen premiei erantzuteko. BEINT bekak aukera paregabea dira unibertsitateko goi-mailako tituludun gazteei nazioartekotzeari eta kanpo-merkataritzari buruzko prestakuntza emateko. Programa honetako parte-hartzaileek erreferentziazko titulu bat lortuko dute, prestakuntza praktikoa jasoko dute eta 8 hilabeteko egonaldia egingo dute munduan barrena kokatutako euskal enpresetan.

 

Oraindik ez dago iruzkinik
Iruzkinak itxita daude dokumentu honetan
Komunikabideek behera kargatzeko
Ekitaldiko kargudunak