Euskal Autonomia Erkidegoko langabezia-tasa 2010eko mailara itzuli da, Astekonomia-k asteko laburpenean jasotzen duen bezala

2021-10-22

2021eko hirugarren hiruhilekoan, langabezia tasa %8,9ra jaitsi zen Euskadin. Azken urteetako tasarik txikiena da, eta jaitsi egin da bai gizonen artean (%8,8), bai emakumeen artean (%8,9). Jaitsiera hori enplegua sortzeari esker lortu da, baina baita biztanleria aktiboaren beherakadari esker ere, Eustatek biztanleria aktiboari buruz egindako inkestaren arabera.

Horixe da Astekonomia txostenak eskaintzen duen adierazle ekonomikoen asteko laburpenaren gai nagusia, eta langabezia-tasa hori ( % 8,9) 2010eko lehen hiruhilekoan zuen mailan dagoela azpimarratzen du ( % 8,8)

Astekonomia-k Eustaten kontu ekonomikoen aurrerapena jaso du, hirugarren hiruhilekoan euskal ekonomiaren hazkundea % 3,8koa izan baita. Kopuru handia da, baina aurreikusitakoa baino txikiagoa. Enpleguaren arloan, % 3,2ko igoera lortu zen 2020ko aldi berarekin alderatuta.

Azkenik, eta atzerrirako salmentei erreparatuz, laburpen honek nabarmentzen du abuztua bereziki ona izan zela atzerrirako ondasunen esportazioetarako. Hilabete horretan, euskal enpresek 1.700 milioi euro inguruko balioa zuten produktuak saldu zituzten, abuztuan izan den kopururik handiena. Petrolioaren deribatuen salmenta funtsezkoa izan zen hazkunde handi horretan.

Asteroko laburpen hau Ekonomia Zuzendaritzak egiten du, «Astekonomia» izenarekin, eta minutu bateko iraupena duten bideo hauen oinarria da, gutxi gorabehera. Horrela, Ekonomia eta Ogasun Sailak era honetako edukiak zabaltzeko modu berri bat eskaintzen du bere irismena zabaltzeko; kasu honetan, ikus-entzunezko formatuan. Sail honek sare sozialetan (Instagram, Lindekin, Youtube eta Twitter) eta Irekian dituen profiletan partekatzen dira bideo horiek.

Oraindik ez dago iruzkinik
Iruzkinak itxita daude dokumentu honetan