Berriak Lehendakaritza

LABIren Aholku Batzordeak gizarte-jarduera normalizatua berreskuratzeko neurri berriak onartu ditu

2021-09-17
  • Dekretu berria irailaren 18an sartuko da indarrean, eta, besteak beste, itxiera ordutegia 03: 00ak arte luzatzea, edukiera % 75era arte zabaltzea eta gaueko aisialdirako establezimenduak berriro irekitzea aurreikusten du.
  • Oinarrizko prebentzio-neurriak mantentzeko beharra azpimarratu du batzordeak, hala nola eskuen higienea, maskara erabiltzea, espazio itxiak aireztatzea eta aglomerazioetan ez parte hartzea.

Iñigo Urkullu lehendakaria buru izan duen gaurko bileran, LABIren Aholku Batzordeak LABIren Batzorde Teknikoaren irizpenaren eta Bizi Berri IV Planaren gomendio zientifiko-sanitarioak aintzat hartuta, prebentzio-neurriak eguneratzeko dekretu berria onartzea erabaki du. Dekretu berria bihar, irailaren 18an, larunbatean, indarrean sartuko da.

Ondoren, Gotzone Sagardui Osasun sailburuak agerraldia egin du, eta egungo egoera aztertu eta dekretuan jasotako neurriak zehaztu ditu.

EGOERAREN AZTERKETA

Osasuneko sailburuak adierazi duenez, beheranzko joera jarraitua da, eta datuek (intzidentzia metatua, txertaketa eta asistentzia-presioa) Euskadi "egoera desberdin baten aurrean" dagoela baieztatzea ahalbidetzen dute. Ondorioz, bi fase hauetan aurrera egin daiteke: trantsizioan eta sendotasunean. "Egungo baldintzetan, egokia da jarduera sozial normalizatua berreskuratzeko trantsizio-etapa kudeatzea", adierazi du sailburuak.

NEURRIAK

  • Merkataritza-, gizarte- eta kultura-jarduera guztietarako itxiera-mugako ordutegia 03: 00ak arte luzatzea.
  • Jardueretan, gehienez ere, ehuneko 75eko edukiera ematea lokal eta instalazio guztiei.
  • Edozein motatako gizarte-, kultura- edo kirol-ekitalditarako esparruetan gehienez ere 1.500 pertsona bildu ahal izango dira barnealdeetan, eta 1.800 pertsona kanpoan. 3.000 lagunetik gorako edukiera duten esparru itxietan, gehieneko edukiera ez da ehuneko 40tik gorakoa izango, eta esparru irekietan, ehuneko 60tik gorakoa.
  • Ostalaritza- eta jatetxe-establezimenduetarako edukieraren ehuneko 75 ezartzen da barnealdeetan. Barran edo zutik kontsumitzeko debekuari eusten zaio. Barnealdeetan zerbitzua 8 laguneko taldetan eta 12 laguneko taldeetan antolatzen jarraituko da.
  • Joko- eta apustu-establezimenduek eta txoko eta elkarte gastronomikoek ostalaritza-sektorerako aurreikusitako baldintzen oso antzekoak bete beharko dituzte.
  • Lonjak, gazte-lokalak eta antzekoak berriro ireki ahal izango dira 16 eta 29 urte bitarteko adin-tartean txertaketak jarraibide osoaren % 85 gainditzen duen unetik aurrera.
  •  Diskotekak eta gaueko aisialdiko gainerako establezimenduak berriz irekitzeko gaikuntza ematen da, honako arau hauen arabera: edukiera-muga barrualdeetan, edukieraren ehuneko 50ean; debekatuta dago barran edo zutik kontsumitzea. Dantza-pista maskara batekin bakarrik erabili ahal izango da. Gainerako xedapenak ostalaritza-sektoreari aplikatzen zaizkionak dira.
  • Barnealdeetan egiten diren museoetara, erakusketa-aretoetara, jolas-zentroetara eta turismo-zentroetara taldeek egiten dituzten bisiten gehieneko kopurua 20 pertsonara arte handitzea.
  • Barne-instalazioetako kirol-jarduera 16 pertsonako taldeetan egituratu ahal izatea ahalbidetzen da.
  • Administrazio publikoek eta enpresek aurrez aurreko jardunera itzultzea erabaki ahal izango dute urrutiko lanari edo telelanari buruzko araudiak arautzen ez dituen lanpostu guztietan. Lan-eremu bakoitzaren tipologia eta baldintza bereziak kontuan hartu beharko dira, eta oinarrizko prebentzio-neurriak mantendu beharko dira, hala nola maskara erabiltzea eta aireztatzea, lan-osasuneko zerbitzuek adierazitakoaren arabera.

ZUHURTZIA

"Hobetzen ari gara, zalantzarik gabe", esan du Gotzone Sagarduik, eta oinarrizko prebentzio neurriak mantentzea eskatu du (eskuak, maskara, aireztapena eta pilaketarik eza), "Normaltasuna" berreskuratzen jarraitzeko.
2 iruzkin
  • @BerrizkoUdala
    2021-09-18

    Comentario de Twitter:
    ❗ #Covid19 aren egoera dela eta gaurtik aurrera indarrean dauden neurri nagusiak.
    https://t.co/Un0vxVpyHA
    ❗ Princ… https://t.co/oBDY41mvaY

  • 2021-09-17

    Qué cambios hay en centros escolares? Las burbujas cambian a cursos completos? Se van a poder realizar extraescolares en los centros educativos, en interiores y juntando burbujas (en caso de que se mantengan por clase)?

Iruzkinak itxita daude dokumentu honetan
Ekitaldiko kargudunak