Berriak Segurtasuna

Josu Erkoreka: "Ertzaintzak beharrezko neurriak hartuko ditu liskarrak, indarkeriazko talkak eta ordena publikoaren asaldurak saihesteko"

2021-09-15

Josu Erkoreka Lehen Lehendakariorde eta Segurtasuneko sailburuak gaurkotasuneko hainbat gairi buruz hitz egin du, hala nola, Henri Parot inguruan datorren larunbatean egingo diren kontzentrazioei eta manifestazioei buruz, EAEko Justizia Auzitegi Nagusiaren edukierei buruzko autoari buruz edo Erandioko erasoari buruz, Bide Segurtasunerako eta Mugikortasun segururako eta Jasangarrirako 2025eko Plan Estrategiko berriaren aurkezpenean.

Hilaren 18rako Henri Parot ETAko presoaren inguruan deitutako kontzentrazioei dagokienez, Josu Erkoreka lehendakariordeak adierazi du gobernu-agintaritzak aztertuko duela eta, legeriak ematen dizkion eskuduntzen barruan, dagozkion arauak edo oharrak emango dituela pertsonen eta ondasunen kalterako izan daitezkeen liskarrak, indarkeriazko talkak eta ordena publikoko asaldurak saihesteko, "Ertzaintzak beharrezko neurriak hartuko ditu".

EAEko Justizia Auzitegi Nagusiaak futbol-estadioetako edukierei buruz emandako autoari dagokionez, Segurtasuneko sailburuak adierazi du Eusko Jaurlaritza ez dagoela ados ebazpenarekin arlo juridikoan eta politikoan, baina errespetatu eta onartu egingo duela; hala ere, esan du deigarria dela Auzitegiak bere buruari osasun-arloko balorazioak egiteko ematen dion gaitasuna, prestakuntza epidemiologikorik ez duenean eta horri buruzko irizpen espezializaturik jaso ez duenean. Lehendakariordeak berretsi du Eusko Jaurlaritzak ez duela autoaren aurkako errekurtsorik jarriko, Lehendakariaren borondatea baita gai hori ez judizializatzea.

Erkoreka sailburuak gogorarazi duenez, neurri murriztaileen inguruan erabaki oso desberdinak eman dira, baina EAEko Auzitegiko areto honek autonomien aurkako jarrera duela azpimarratu du. Zentzu horretan, ziurgabetasun eta segurtasun juridiko horrekin pandemiaren aurkako borrokari eraginkortasunez aurre egitea objektiboki zaila dela azpimarratu du.

Era berean, Erandion adingabe batek jasandako erasoari buruz galdetu diotenean, Segurtasuneko sailburuak jakinarazi du, lehen salaketa jarri zenetik, Ertzaintza kasuaren jarraipen zorrotza egiten ari dela eta adingabeen fiskaltzarekin lankidetza estuan ari dela, hark definitzen baitu kasu horietan jarraitu beharreko jarraibidea, bai eta zerikusia duten gainerako erakunde publikoekin ere.

Oraindik ez dago iruzkinik
  • Zerbait esan nahi duzu?… iruzkindu albiste hau
Ekitaldiko kargudunak